Brıdjıt Bardo avstralııalyq túıelerdi qorǵap, málimdeme jasady
ASTANA. Jeltoqsannyń 3-i. QazAqparat - Tanymal kınojuldyz Brıdjıt Bardo avstralııalyq túıelerdi qorǵap, málimdeme jasady. «Sizder qatelikterińizdi únemi qaıtalaısyzdar. Aldymen qoıandardyń, odan keıin jylqylardyń kózderin joıdyńyzdar. Endi mine túıelerge shúıliktińizder. Bul Avstralııa sııaqty memleket úshin uıat jáne laıyqsyz is», - dep atap kórseteli Brıdjıt Bardo óz hatynda.
Aktrısa Avstralııanyń premer-mınıstri Kevın Radd myrzaǵa hat joldap, «Oısylqara» tuqymdaryn joıýdy toqtatýǵa shaqyrdy, dep habarlaıdy ITAR-TASS agenttigi.
«Bul uıat is. Tikushaqtardan oq jaýdyryp, Avstralııanyń soltústik shtattaryndaǵy 6 myń bas túıeniń kózin joıýdy maqsat etken shara ashý týǵyzbaı qoımaıdy», delingen aktrısanyń atymen atalatyn Janýarlardy qorǵaý qorynyń málimdemesinde.
Jaqynda shamamen alty myńdaı jabaıy túıe eldiń soltústiginde ornalasqan avstralııalyq shaǵyn eldi mekenge shabýyl jasady. Qurǵaqshylyqtyń saldarynan ábden shóldep, osy aýmaqqa sý izdep kelgen janýarlar naǵyz búldirýmen aınalysyp jatqan kórinedi. Túıeler úılerge kirip kelip, sý quıylǵan ydystardy qıratqan. Sonymen qatar, olar áýejaıdaǵy apattyq ushý-qoný jolaǵyn da búldirgen. Jaǵdaıdyń ýshyqqany sonshalyq, túıeler 350-ge jýyq adam turatyn eldi mekenniń ınfraqurylymyn buzýda.
Avstralııa úkimeti ázirlegen baǵdarlamaǵa sáıkes, el aýmaǵyndaǵy birneshe myńdaǵan jabaıy túıeniń kózi joıylǵaly otyr. Mundaı qatal sheshimniń qabyldanýyna osyndaǵy túıe tuqymynyń tym kóbeıip ketýi sebep bolyp otyr. Úkimet baǵdarlamasyna sáıkes, ań aýlaýshylar olardy tikushaqtan jáne mashınamen júrip atatyn bolady.
Bul baǵdarlama qoǵamda úlken pikirtalas týǵyzyp otyr. Kópshilik el bul sharany adamgershilikke jatpaıdy dep sanap, túıe tuqymyn azaıtýdyń basqa da joldaryn usynýda. Mysaly, janýarlardy uryqsyzdyqqa ushyratatyn dáriler qosylǵan jemshópter berý týraly usynys jasalýda.
Oısylqara tuqymdary Avstralııaǵa alǵash ret 1840 jyldary ákelingen. Olar kolonııashylarǵa qurlyqty ıgerýde kómektesedi degen maqsatpen jetkizilgen. Sodan beri túıeler jańa mekendi tolyq jersinip, 1 mıllıon basqa deıin kóbeıip otyr. Búginde olar aýyl sharýashylyǵyna úlken zııan keltirýde.
