Birge salaıyq: Jumyssyz azamattar tasqynnan zardap shekken óńirlerge úı salysa alady
ASTANA. KAZINFORM – QR Eńbek jáne halyqty áleýmettik qorǵaý mınıstrligi «Birge salaıyq!» atty jańa jobany iske qosty. Jumyssyz azamattar sý tasqynynan zardap shekken óńirlerde turǵyn úı salý jáne ınfraqurylymdy qalpyna keltirý jumystaryna atsalysý arqyly jumysqa ornalasa alady. Qurylys kompanııalary usynatyn bos jumys oryndaryn Elektrondyq eńbek bırjasynan kórýge múmkindik bar.
Vedomstvonyń málimetinshe, Eńbek resýrstaryn damytý ortalyǵy «Birge salaıyq!» jobasy sheńberinde azamattardy jumysqa ornalastyrýdy súıemeldeý jónindegi arnaıy platforma ázirledi.
Bul Enbek.kz elektrondyq eńbek bırjasyndaǵy jańa modýl bolady, osynda jumysqa ornalasýǵa jáne óńirlerge turǵyn úı qory men ınfraqurylymdy qalpyna keltirýge kómektesýge nıet bildirgen kez kelgen adam bos oryndarmen tanysyp, ózine unaǵan kez kelgenine ynta bildirip, áńgimelesýden óte alady. Qazirgi ýaqytta platformada 42 bos jumys orny bar.
«Bul jobanyń mańyzdylyǵy sol, biz jumys tabýǵa jáne sý tasqynynan zardap shekken óńirlerdi qalpyna keltirýge qatysýǵa nıet bildirgen árbir adamdy jedel jumysqa ornalastyrý úshin tsıfrlyq ortany qamtamasyz etemiz. Qazirgi ýaqytta biz jumys berýshiler bazasyn jáne bos jumys oryndaryn tolyqtyrýmen aınalysýdamyz. Óńirler úshin kim-kimniń de qatysýy óte mańyzdy, óıtkeni, qazir bilikti mamandar da, beıindi bilimi joq mamandar da qajet ekenin aıta ketý kerek», – dep atap ótti QR Eńbek jáne halyqty áleýmettik qorǵaý mınıstri Svetlana Jaqypova.
QR Eńbek jáne halyqty áleýmettik qorǵaý mınıstrligi qazaqstandyqtardy jobaǵa qatysýǵa jáne zardap shekken óńirlerdi qalpyna keltirýge óz úlesterin qosýǵa shaqyrady!
Esterińizge sala keteıik, sý tasqyny saldarynan Aqmola, Aqtóbe, Atyraý, Batys Qazaqstan, Qostanaı, Pavlodar, Soltústik Qazaqstan oblystarynyń turǵyndary men ınfraqurylymy zardap shekti.
