Birge áskerge barǵan egizder bolashaq mamandyǵyn da birge tańdady
ASTANA. KAZINFORM — Sholpan Tileýbaeva úshin bıyl uldaryn áskerge shyǵaryp salý eki ese tolqynysqa toly boldy. Egizderi Aıbol men Nurbol mektep bitirgen soń birden joǵary oqý ornyna túsýge asyqpaı, aldymen Otan aldyndaǵy boryshyn óteýdi jón kórgen eken, dep habarlaıdy Qorǵanys mınıstrliginiń baspasóz qyzmeti.
Olar áskerı tájirıbe jınap, mamandyq meńgerip, keıin bilim granttarynyń múmkindigin paıdalanyp, oqýyn jalǵastyrýdy josparlaǵan.
Qazir aǵaıyndy egizder Gvardeısk garnızonyndaǵy 30212 áskerı bóliminiń kishi mamandardy daıarlaý ortalyǵynda daıyndyqtan ótip jatyr. Olar bul jerden júk kólikteriniń júrgizýshisi mamandyǵyn meńgerep shyǵady.
Egizder bolashaq josparyn da birge quryp otyr. Áskerden keıin joǵary bilim alýdy kózdeıdi. Al ázirge áskerı qyzmettiń ózderine kóp nárse úıretip jatqanyn aıtady.
— Alǵashynda ońaı bolǵan joq. Jańa kún tártibine, tártip pen jaýapkershilikke úırený kerek. Qazir bul tájirıbeniń áskerden keıin de paıdasy tıetinin jaqsy túsindik. Alda áli birneshe aı qyzmet bar. Odan keıin oqýymyzdy jalǵastyrǵymyz keledi. Josparymyz kóp, al áskerı qyzmet — sol maqsatqa jetý jolyndaǵy bir kezeń, — deıdi Aıbol men Nurbol Uldahan.
Merzimdi áskerı qyzmet barysynda egizder azamattyq ómirde de qajet bolýy múmkin mamandyqty meńgerip jatyr. Oqý ortalyǵynda áskerı qyzmetshilerge armııada da, azamattyq salada da suranysqa ıe qos maqsatty mamandyqtar oqytylady.
Munda júk kólikteri men arnaıy tehnıkanyń júrgizýshileri, kóp maqsatty tartqyshtar men jer qazý mashınalarynyń mehanık-júrgizýshileri, áskerı aspazdar, saperler, sondaı-aq tank pen jaıaý ásker jaýyngerlik mashınalary ekıpajdaryna arnalǵan mamandar daıarlanady.
Aıbol men Nurbol KamAZ jáne «Oral» markaly áskerı júk kólikterin basqarýdy úırenip júr. Qyzmetten keıin bul daıyndyq olar úshin jaqsy kásibı negiz bolmaq. Sebebi júk kóliginiń júrgizýshilerine logıstıka, qurylys, ónerkásip, aýyl sharýashylyǵy, kommýnaldyq jáne kólik salalarynda suranys joǵary.
Alaıda egizderdiń anasy úshin olardyń alǵan mamandyǵynan buryn, áskerı qyzmet kezinde azamat retinde qalyptasýy mańyzdy. Uldarymen kezdeskende Sholpan Tileýbaeva olardyń boıyndaǵy ózgeristi birden baıqaǵan.
— Uldarymdy kórgende olardyń qanshalyqty eseıgenin birden sezindim. Ekeýi de jınaqy, salmaqty, ózine senimdi bolypty. Árıne, eki ulymdy birdeı áskerge shyǵaryp salý ońaı bolǵan joq, árqaısysy úshin alańdadym. Al qazir olarǵa qarap, áskerı qyzmettiń paıdasy tıgenin túsinemin. Ana úshin balalarynyń eseıip, azamat bolyp qalyptasqanyn kórý — erekshe qýanysh, — deıdi Sholpan Tileýbaeva.
Anasynyń aıtýynsha, uldarynyń alǵa qoıǵan jospary kóp. Olar áskerı qyzmetin abyroımen aıaqtap, joǵary oqý ornyna túsip, bilim alyp, bolashaq mamandyǵyn tańdaýdy kózdeıdi.
— Búginde olarǵa berilip otyrǵan barlyq múmkindikti durys paıdalansa eken. Aldymen Otan aldyndaǵy boryshyn abyroımen ótep, keıin bilim alyp, ómirden óz ornyn tapsa eken. Eń bastysy — osy ózara tatýlyǵyn saqtap, bir-birine árdaıym qoldaý kórsetip, jaqsy azamat bolyp qalyptassa eken deımin. Men olardy maqtan tutamyn, — deıdi egizderdiń anasy.
Oqý ortalyǵyndaǵy daıyndyqty aıaqtaǵan soń Aıbol men Nurbol meńgergen mamandyǵyn rastaıtyn sertıfıkat alady. Odan keıin olar áskerı bólimge jiberilip, merzimdi áskerı qyzmetin jalǵastyrady.
Al oqý ortalyǵynda alǵan bilimi men tájirıbesi egizderdiń áskerı qyzmetimen birge aıaqtalmaıdy. Bul daǵdylar olardy azamattyq ómirde de jańa múmkindikterge bastaıtyn kásibı negiz bolmaq.
Osyǵan deıin Ulttyq ulannyń áskerı bólimderinde 40-qa jýyq egiz jup qyzmet etip júrgenin jazdyq
