Brejnevtiń Qonaevqa syılaǵan ZIL-114 avtomobıli qaıda?
ALMATY. QazAqparat - Kórnekti memleket jáne qoǵam qaıratkeri D. A. Qonaevqa KSRO OK Bas hatshysy L. I. Brejnevtiń syılaǵan ZIL-114 kórneki jeńil avtokóligin jeke qoldan D. A. Qonaevtyń murajaıyna aldyrǵymyz keledi.
Búgin Almatyda D. A. Qonaevty eske alý sharasy barysynda «QazAqparat» tilshisine bergen suhbatynda D. A. Qonaev murajaıynyń dırektory Tımýr Jumanov osylaı dedi.
Onyń aıtýynsha, ótken ǵasyrdyń 90-shy jyldary jekeshelendirý kezinde jeńil avtokólik jeke qolǵa ótip ketken eken.
«Bul Qazaqstandaǵy jalǵyz kórneki jeńil avtokólik. Ony shamamen ótken ǵasyrdyń 70-inshi jyldarynyń basynda KSRO Ortalyq komıtetiniń bas hatshysy L. I. Brejnev sol kezdegi Qazaqstan kompartııasy ortalyq komıtetiniń birinshi hatshysy Dinmuhamed Ahmetuly Qonaevqa syılaǵan eken. Óıtkeni D. A. Qonaev sol kezeńde Saıýsı bıýronyń músheligine ótken. Brejnevtiń ózi ZIL-117 avtokóligine aýysqan. Mundaı avtokólik sol kezde basqa keńestik respýblıka basshylarynyń birde-birinde bolmaǵan. Dinmuhamed Ahmetuly bul mashınamen kóbinese qala ishinde júrgen», - dedi T. Jumanov.
Ol sonymen qatar, búginde jeke qolda júrgen tarıhı avtokólikti murajaıǵa aldyrýdy kózdeıtindigin jetkizdi.
«Endi bul avtokólik sol kezde úkimettiń balansynda bolǵan ǵoı. Dinmuhamed Ahmetuly ornynan ketken soń, ol Ortalyq Komıtettiń arnaıy garajynda saqtalǵan. Biraq keıin, 90-shy jyldary jekeshelendirý kezinde jeke qolǵa ótip ketken. Bizdiń estýimizshe, ol qazir Astana jaqta jeke qolda júrgenge uqsaıdy. Onyń baǵasy árıne, sumdyq qymbat. Biraq, sol tarıhı avtokólikti biz D. A. Qonaevtyń murajaıyna qalaıda aldyrsaq degen nıetimiz bar. Qazir osyǵan baılanysty izdestirý jumystaryn júrgizip jatyrmyz», - dedi T. Jumanov.
Al qazir, D. A. Qonaev turǵan turǵyn úıdiń aýlasynda «Pontiac Grand Prix» avtokóligi qoıylǵan. Bul, Dinmuhamed Ahmetulynyń jalǵyz jáne jeke avtokóligi. Ony 1992 jyly almatylyq jas bıznesmender syılaǵan eken.
Aıta ketelik, ZIL-114 az serııamen shyǵarylǵan eń joǵary klasty keńestik avtomobıl. Shanaǵy «lımýzın» tıptes. Barlyǵy 113 dana shyǵarylǵan. Ony zaýytta arnaıy brıgada qolmen jınaıtyn bolǵan jáne árbir qosalqy bólshegine shanaqtyń nómir basylyp otyrǵan.
