Breıvıktiń iske asyra almaǵan qylmystary bolǵany anyqtaldy
ASTANA. 20 sáýir. QazAqparat - Norvegııada 77 adamnyń ómirin qıǵan lańkes Anders Breıvıktiń isin qarap jatqan sottyń 4-shi otyrysy aıaqtaldy,
dep habarlaıdy caspionet.kz saıty.
Sot keshe qylmyskerdiń oılastyrǵan, alaıda iske asyrmaǵan pıǵyldary bar ekenine Breıvıktiń ózinen belgili boldy.
Breıvık Norvegııanyń burynǵy premer-mınıstri Gro Harlem Brýndtlandty urlap ketip, keıin onyń basyn kesip óltirýdi josparlaǵanyn aıtyp berdi. Sondaı-aq ol, «Oslo qalasynda bir emes, 3 bomba jarmaq boldym»,- dep málimdedi. Aıyptalýshynyń aıtýynsha, 3 bombany bir mezette alystan basqaryp iske qosý qıynǵa soǵatyndyqtan odan bas tartýǵa týra kelgen. Ótken jyldyń 22 shildesinde Breıvıktiń qoıǵan bombasy Oslonyń ortalyǵynda jarylyp, odan 8 adam qaza tapsa, 209 adam ártúrli dárejede jaraqat alǵany belgili. Degenmen, onyń basty qylmysy Ýtoııa aralyndaǵy jastar lagerinde 69 adamdy atyp óltirgeni bolyp otyr. Breıvık Ýtoııaǵa kelgen kezde burynǵy premer-mınıstr araldan ketip qalǵan eken. Áıtpegende qylmysker onyń basyn kesip, beınejazbaǵa túsirip, ony taratpaq bolǵan. Ózin kináli dep sanamaıtyn qylmysker sot májilisinde «zorlyq-zombylyq ózińniń aldyńa qoıǵan maqsatqa jetýdiń bir quraly»,- dep málimdedi shimirikpesten. Breıvık sondaı-aq atys-shabysqa qurylǵan kompıýterlik oıyndarǵa qumar bolǵanyn aıtyp berdi.
