Breıvık túrmede jábir kórgenin aıtyp, shaǵym túsirdi
ASTANA. 2 aqpan. QazAqparat - Jappaı kisi óltirgeni úshin abaqtyǵa jabylyp, jazasyn ótep jatqan Anders Breıvık túrmedegi jaǵdaıdyń syn kótermeıtinine shaǵymdandy.
Reuters habarlaǵandaı, ol jábir kórgenin aıtyp, Norvegııanyń ádilet mınıstri men túrme bastyǵynyń ústinen shaǵym túsirgen. Jýyq arada onyń shaǵymyn polıtsııa qaraıtyn boldy.
Breıvıktiń qorǵaýshysy túrme ákimshiliginiń tutqynǵa qysym kórsetip, óz-ózine qol jumsaýǵa deıin jetkizbek bolǵanyn aıtyp otyr. Naqtyraq aıtqanda, Breıvık jarty jyl boıy ózin ózge tutqyndardan oqshaýlap ustaǵanyna jáne jeke basyn jıi tekseretinine, sondaı-aq, taza aýamen tynys alýyna múmkindik bermegenine narazylyq bildirgen.
muslim.kz saıtynyń jazýynsha, buǵan qosa, Breıvık ózge bireýmen ıdeologııa tóńireginde áńgimelesýine tyıym salynǵanyn jaıyp saldy. Qorǵaýshynyń sózine qaraǵanda, túrme ákimshiligi sóz bostandyǵyna shekteý qoıyp, zańdy belden basqan.
Anders Breıvık 2011 jyldyń shilde aıynda Oslo qalasyndaǵy ortalyq aýdandardyń birinde bomba jaryp, jastarǵa arnalǵan Ýtoııa aralyndaǵy lagerde adamdarǵa oq boratqan. Breıvıktiń qolynan 77 adam qaza tapqan edi sol kezde. Sot protsesinde ol Eýropany ıslam jaılap bara jatqan soń osyndaı qadamǵa bardym, dep aqtalǵan. Ol sottyń sheshimimen aqyl-esi aýysqan adam retinde 21 jylǵa bas bostandyǵyn aıyrylǵan edi.
Kúsheıtilgen kúzet qoıylǵan túrmede Breıvıkke barlyq jaǵdaıy jasalǵan úsh bólme bólingen. Onyń bireýi - jatyn bólmesi bolsa, ekinshisi - kabınet, al úshinshisi - dene shynyqtyrý zaly.
2012 jyldyń qarasha aıynda da ol túrmedegi jaǵdaıdy aıtyp, shaǵym túsirgen bolatyn. Alaıda, onyń bul shaǵymyna resmı jaýap qatqan eshkim bolmady.
