Breıvık sot zalynda óz manıfestin kórgen boıy kózine jas aldy
ASTANA. 17 sáýir. QazAqparat - Terrorıst Anders Berıng Breıvık Oslodaǵy lańkestik oqıǵasy týraly sot isi boıynsha ótken alǵashqy sot otyrysynda óziniń nasıhat rolıgin kórgen boıy kózine jas aldy, dep habarlaıdy BNews.kz.
Life News habarlaǵandaı, mýltıkýltýralızmge qarsy kúresti nasıhattaıtyn óz «Manıfestiniń» paraqtaryn úlken ekrannan tamashalaǵan kezinde qatygez qylmyskerdiń betteri qyzaryp, ıegi men erinderi dirildep ketti.
Esterińizge sala keteıik, búgin, 16 sáýirde Anders Berıng Breıvık sotqa qara kostıým kıip, altyn tústi galstýk taǵyp kelip, sot zalyna kúlimsirep kirdi . Qoldarynan kisen sheshilgennen keıin ol zalǵa jınalǵan qaýymmen natsıstik úlgide - oń qolyn alǵa qaraı sermeı sálemdesti, biraq sol sátte onyń alǵa sermegen judyryǵy jumýly boldy.
«Mergen» norvegııalyq sotty moıyndamaıtyndyǵyn jáne áskerı trıbýnal aldynda jaýap berýi kerek ekendigin málim etti. Soǵan qaramastan sotqa syılastyq tanytatyndyǵyn aıtty.
Jýrnalıster atap úlgergen «Ǵasyr isi» kem degende 10 aptaǵa sozylady. Onda shamamen 150 kýágerden jaýap alynatyn bolady. Alǵashqy aptada - 16 men 23 sáýir aralyǵynda - aıyptalýshynyń ózinen jaýap alynady.
Eger sot Breıvıkti psıhıkalyq naýqas dep tapsa, ol jyndyhanaǵa kúshtep emdetilýge jiberiledi, emshara merzimi onyń ómir boıyna deıin sozylýy múmkin. Al osy eldiń zańnamasyna sáıkes, lańkestiń jasaǵan qylmysyna belgilenetin eń shekti jazalaý merzimi 21 jylǵa teń.
Esterińizge sala keteıik, Anders Breıvık Oslodaǵy 2 lańkestik oqıǵany uıymdastyrǵany úshin aıyptalyp otyr, sonyń saldarynan 77 beıbit azamat qaza qushqan bolatyn.
