Breıvık 77 adamdy óltirýin ózimdi ózim qorǵaý dep esepteıdi
ASTANA. 14 sáýir. QazAqparat - 77 adamdy ajal qushtyrǵan norvejdik Anders Berıng Breıvık bul qylmysynyń ózin ózi qorǵaý bolǵandyǵyn dáleldemek,
dep habarlaıdy Dagbladet. Breıvıktiń advokaty Geır Lıppestadtyń málimdeýinshe, ol qorǵaýyndaǵy adamnyń ótinishin oryndaýǵa zań boıynsha mindetti jáne oqıǵanyń osylaısha damýy sottalýshynyń jadaıyna keri áserin tıgizbeıdi.
«Árıne, mundaı qorǵanyshpen biz alysqa barmaıtynymyzdy bilemiz, biraq onyń ustanymyn qorǵap shyǵý - meniń paryzym», - deıdi advokat. Onyń aıtýynsha, sotta qorǵaýshylar Breıvıkke óz pozıtsııasyn túsindirip bere alatyndaı qylyp suraqtar qoıady. Lıppestad, sondaı-aq, qorǵaýshylardyń sottaǵy basty mindeti Breıvık ustanymyn durys túsindirýge jumylý ekenin basa aıtty.
Sot protsessi Osloda 16 sáýir kúni bastalady. Jýyrda ótkizilgen psıhıatorlyq tekseristen keıin Breıvıktiń aqyl-esi durys dep tanyldy. Oǵan ózi de qýanyshty kórinedi. Budan buryn ol ómir boıy bas bostandyǵynan aıyrý jazasyn kúshtep emdeýge aýystyrsa dep kelgen bolatyn.
Esterińizge sala keteıik, Breıvık 2011 jyly 22 maýsymda Norvegııada eki terakt uıymdastyrǵan bolatyn. Aldymen ol Oslonyń ortalyǵynda jarylys uıymdastyryp, sosyn Ýtoııa aralyndaǵy jastar alańyna baryp, demalýshylardy myltyqpen qyryp salǵan edi. Sodan keıin aralǵa polıtsııa jetken kezde, eshbir qarsylyqsyz berilgen bolatyn.
Óz isin túsindirgen Breıvık osylaısha Norvegııa men Eýropanyń nazaryn sońǵy kezde kóbeıip ketken musylmandardyń mıgratsııasyna aýdartyp, ózi qaýipti dep sanaıtyn mýltıkýltýralızmge qarsy shyqqan túri eken. ANB-NTB-nyń habarlaýynsha, dál osy mýltıkýltýralızmmen kúres Breıvıktiń jasaǵan qylmysyn ózimdi-ózim qorǵaýym deýine negiz bolǵan eken.
