Breık-dans pen serfıng Parıjdegi Olımpıada oıyndarynyń baǵdarlamasyna endi

NUR-SULTAN. QazAqparat - Breık-dans, skeıtbordıng, sporttyq quzǵa órmeleý jáne serfıng 2024 jyly Parıjde ótetin Olımpıada oıyndarynyń sporttyq baǵdarlamasyna ýaqytsha qosyldy. Bul týraly QR Ulttyq Olımpıadalyq komıtetinen málim etti, dep xabarlaıdy QazAqparat.

Mundaı sheshim 25 maýsym kúni Halyqaralyq olımpıada komıtetiniń (HOK) 134-sessııasynda qabyldanǵan.

2024 jyly Parıjdegi Olımpıada oıyndarynyń uıymdastyrý komıteti HOK-qa qosymsha sport túrlerin usyna alatyn ekinshi Uıymdastyrý komıteti sanalady. Bul 2020 jylǵy Olımpıada oıyndarynyń kún tártibin reformalaýdyń bir bóligi.

«Parıj usynǵan tórt sport túri de 2020 jylǵy Olımpıada kún tártibine tolyq sáıkes keledi. Sebebi, olar Olımpıada oıyndarynyń genderlik turǵydan teńgerimdi jáne zamanaýı bolýyna yqpal etýde. Parıjdegi Olımpıada oıyndarynyń baǵdarlamasy keleshek urpaqpen sabaqtastyq ornatýǵa múmkindik beredi», - dedi HOK prezıdenti Tomas Bax.

HOK Atqarý komıteti 2024 jylǵy Parıjdegi Olımpıada oıyndaryna qazirgi baǵdarlamaǵa engen jáne usynylǵan jańa jarystar boıynsha, sondaı-aq sportshylarrǵa arnalǵan kvotalar jónindegi sońǵy sheshimdi 2020 jyldyń jeltoqsanynda qabyldaıdy.

Aıta keteıik, 25 maýsym kúngi HOK sessııasyndaǵy daýys berýden keıin Parıj-2024 baǵdarlamasyna basqa sport túrleri usynylmaıdy.