Brexit jaǵdaıynda Eýropalyq bank retteýshisi Londonnan kóshiriledi
ASTANA. QazAqparat - Eýropalyq bank qaýymdastyǵy (EBA) - Eýroodaq elderinde bank erejelerin úılestiretin baqylaýshy organ Ulybrıtanııa EO quramynan shyqqan jaǵdaıda Londonnan kóshiriledi, dep habarlady RBK.
Welt am Sonntag nemis gazetine bergen suhbatynda EBA basshysy Andrea Enrı Ulybrıtanııa azamattary 23 maýsymda eldiń EO-dan shyǵýyna daýys berse, onda qaýymdastyqtyń Londondaǵy shtab-páteri ózge eýropalyq astanaǵa kóshiriletinin aıtty.
Enrı referendým nátıjesine qaramastan, uıym eýroǵa kóshken jáne óz valıýtasyn saqtap qalǵan elder úshin biryńǵaı bank erejelerin qurý boıynsha jumystaryn jalǵastyratynyn jetkizdi.
EBA basshysy qazir EO bank sektory 5 jyl burynǵy jaǵdaıǵa qaraǵanda turaqty ekenin aıtty. Enrı daýlar men aıyppuldardyń aldyn alý úshin bankter ishki bıznes-mádenıetti ózgertýi kerek dep sanaıdy.
15 maýsymda Ulybrıtanııanyń qarjy mınıstri Djordj Osborn Eýroodaqtan shyqsa, el aldaǵy tórt jylda 30 mlrd. eýro shyǵyndanady deıdi. Osborn úkimet bıýdjettegi tapshylyqtyń ornyn toltyrýy úshin salyqty kóterýge májbúr bolatynyn eskertti. Mınıstr Ulybrıtanııanyń Eýroodaqtan shyǵýy densaýlyq saqtaý, qorǵanys, bilim berý, polıtsııa jáne kólik salasyna jumsalatyn memlekettik shyǵyn azaıýy múmkin degen boljam aıtty.
