Brexit týraly jańalyqtarǵa baılanysty Reseı rýbli quldyrady
ASTANA. QAZAQPARAT - Ulybrıtanııadaǵy referendým qorytyndysy Máskeý bırjasyndaǵy saýda-sattyq ashylýyndaǵy Reseı ındeksi men valıýtasynyń quldyraýyna ákep soqty, dep habarlaıdy RBK.
Juma kúni, 24 maýsymda, Máskeý bırjasyndaǵy saýda-sattyq ındeksterdiń tómendeýimen jáne rýbldiń túsýimen bastaldy. Máskeý ýaqytymen 10:01-de MMVB (Máskeý bankaralyq valıýta bırjasy) ındeksi 1856,3 pýnktke deıin 3,28% tómendedi, RTS - 909,88 pýnktke deıin 3,32% qulady. Sol mezette AQSh dollary 1,6% qymbattap, 65,9 rýblge baǵalandy. Eýro 72,7 rýblge deıin 0,96% arzandady.
Quldyraýdyń kóshin bastap turǵan - Sberbank (-5,8%), Rosneft (-4,6%) jáne Rýsal (-4,4%) aktsııalary bar.
Ulybrıtanııadaǵy referendým nátıjesi týraly jańalyqtar kórinisinde Reseı aktıvteri qunyn joǵaltýda. BBC málimetteri boıynsha, referendýmda 51,9% daýys jınaǵan Brexit jaqtaýshylary jeńiske jetti. Ulybrıtanııanyń EO-dan shyǵýy úshin 17,4 mln. adam daýys bergen.
Óz kezeginde, Brexit qarsylastary 48,1% daýys jınaǵan (16,14 mln. adam). Anglııa men Ýelste eýroskeptıkter ústem tússe, Shotlandııa men Soltústik Irlandııada Eýroodaqtan shyǵýdy qoldamaıtyndar kóbirek. Referendýmnyń resmı qorytyndysy aıdan anyq sekildi. Onyń ústine, referendým bastalmaı turyp, Devıd Kemeron Brexit jaqtaýshylary jeńgen jaǵdaıda, tez arada Ulybrıtanııanyń EO-dan shyǵýy týraly kelissózder júrgizýdi bastaımyn degen bolatyn.
