Brexit týraly kelissóz tyǵyryqqa tireldi
ASTANA. QazAqparat - Eýroodaq pen Ulybrıtanııa arasyndaǵy Brexit boıynsha kelissózder tyǵyryqqa tireldi. Bul týraly Brıýsselde ótken pikirtalastyń besinshi raýndynan keıin Eýroodaq tarapynan kelissóz júrgizýshi Mıshel Barne málimdedi, dep jazady Habar 24.
London Odaqtan shyǵý úshin tólenetin ótemaqy somasyn aıtýdan bas tartqan. Muny kelissóz júrgizýshi «túsiniksiz jaǵdaı» dep atap ótti. Sondaı-aq bir aptadan soń London men Brıýssel arasyndaǵy saýda daýlaryn talqylaıtyn Eýroodaq Sammıtıne de daıyn emestigin jetkizdi. Ulybrıtanııadaǵy eýropalyqtardyń jaǵdaıy, Irlandııa men Soltústik Irlandııa shekarasyndaǵy máseleler de ázirge sheshýsiz kúıinde qalyp otyr.
«Biz tek tehnıkalyq máselelerdi talqyladyq. Biraq Ulybrıtanııaǵa qatysty ótemaqy kólemi boıynsha tyǵyryqqa tireldik. Bul jobaǵa qatysýshy myńdaǵan eýropalyq úshin alańdarlyq jaǵdaı. Sondaı-aq salyq tóleýshiler de mazasyzdanýy múmkin. Degenmen brıtandyqtar úshin Eýroodaqta jáne eýropalyqtar úshin Ulybrıtanııada quqyqtyq kepildikter boıynsha progreske qol jetkizdik dep aıta alamyn», - dedi EO-dan Brexit boıynsha kelissóz júrgizýshisi Mıshel Barne.
«Kóp is atqardyq, degenmen, áli de mańyzdy mindetter jeterlik. Maýsym aıynda qol jetken mańyzdy progres týraly da aıta ketken jón. Sotta azamattardyń quqyǵynyń kepildigi týraly kelisimdi taıaý arada sheshemiz degen oıdamyn. Bizdiń odaqtan shyǵýymyz Ulybrıtanııa men Eýrooadaqtyń bolshaqtaǵy qarym-qatynasy jaıly pikirtalasqa baılanysty bolma jáne biz bul úderisti bastaýǵa tolyqtaı daıynbyz», - dedi Ulybrıtanııanyń EO-tan shyǵý boıynsha mınıstri Devıd Devıs.
