Brexit nátıjesi EQDB-nyń Qazaqstandaǵy qyzmetine áser etpeıdi - Djanet Hekman
ASTANA. QazAqparat - Ulybrıtanııanyń Eýroodaqtan shyǵýy týraly Brexit nátıjesi Eýropanyń qaıta qurý jáne damý bankiniń Qazaqstandaǵy qyzmetine áser etpeıdi. Bul týraly banktiń Qazaqstan boıynsha dırektory Djanet Hekman málim etti.
«Brexit nátıjeleri Eýropalyq banktiń qazaqstandaǵy qyzmetine áser etedi dep oılamaımyn. Eýropanyń qaıta qurý jáne damý banki jan-jaqty damý banki bolyp sanalady, banktiń quramynda 67 memleket bar. Bul elderdiń arasynda Eýroodaqtyń elderi ǵana emes, AQSh, Japonııa, Avstralııa sııaqty elder bar»,-dedi ol Astanadaǵy baspasóz máslıhatynda jýrnalısterdiń suraǵyna jaýap bere otyryp.
Aıta keteıik, eýropalyq bank - Qazaqstandaǵy iri ınvestorlardyń biri. Qazaqstan Úkimetimen áriptestikti keńeıtý týraly kelisimge qol qoıǵan soń, bank nesıeleý mólsherin jylyna 700 mln dollarǵa jetkizdi. Qazirde elimiz boıynsha bank 215 jobaǵa 6,7 mlrd eýro ınvestıtsııa quıǵan.
