Brexit Qazaqstan men Ulybrıtanııa qarym-qatynasyna yqpal etpeıdi - Alan Dankan
ASTANA. QazAqparat - Ulbrıtanııanyń Eýropalyq odaqtan shyǵýy Qazaqstanmen ekijaqty qarym-qatynasty nyǵaıtýyna esh kedergi keltirmeıdi, dep habarlaıdy QazAqparat.
Bul týraly Ulybrıtanııanyń Eýropa men Amerıka isteri jónindegi mınıstri Alan Dankan búgin QR Tuńǵysh Prezıdenti - Elbasy kitaphanasynda ótken «HHІ ǵasyrdaǵy Ulybrıtanııa jáne qazaqstandyq-brıtandyq qatynastar» kezdesýinde málim etti.
«Qazaqstannyń Syrtqy ister mınıstri Qaırat Ábdirahmanovpen kezdesýde eki el arasyndaǵy yntymaqtastyq máselelerin talqyladyq. Men onda Ulybrıtanııanyń sońǵy bes jylda qol jetkizgen joǵary deńgeıdegi ekijaqty qarym-qatynasty damytýǵa múddeli ekenin aıttym. Ulybrıtanııa saıasatyndaǵy eń kúrdeli máselelerdiń biri - bizdiń Eýroodaqtan shyǵýymyz. Biraq, bir nárse anyq, Ulybrıtanııa álemmen ózara yqpaldastyqty jalǵastyra beredi. Biz Eýropa odaǵynan shyǵamyz, biraq Eýropadan shyǵyp ketpeımiz. Sondaı-aq, biz ózara qarym-qatynastardy nyǵaıtyp, Qazaqstan sekildi eldermen anaǵurlym myqty seriktestik ornatqymyz keledi. Sol sebepti, Qazaqstan men Ulybrıtanııa Eýroodaqtan tys jańa róldi damytýǵa tyrysady», - dedi Alan Dankan.
Onyń aıtýynsha, Eýroodaqtan shyǵý - álemnen shetkeri qalý emes. Brıtanııa aldaǵy 18 aı boıy EO shyǵý týraly kelissózder júrgizedi jáne eýropalyq kórshilerimen, seriktesterimen jańa qarym-qatynas ornatady.
«Ótken jyly brıtandyqtar Eýropa odaǵynan shyǵýǵa daýys bergende, Brıtanııanyń BUU Qaýipsizdik Keńesinen nemese NATO-dan shyǵýyna daýys bergen joq. Olar úlken jetiliktiń nemese úlken jıyrmalyqtyń músheliginen bas tartqan joq. Olar Brıtanııanyń bostandyq pen demokratııa, zań ústemdigine adaldyǵynan bas tartqan joq. Osylaısha, halyqaralyq uıymdarda Qazaqstan sekildi seriktestimizben álemdegi beıbitshilik pen qaýipsizdikti, zańdar men qaǵıdalarǵa negizdelgen halyqaralyq júıelerdi damytý úshin, qorǵaý úshin jumys isteıtin bolamyz», - dep óz sózin tolyqtyrdy brıtandyq mınıstr.
Sonymen birge, A.Dankan Qazaqstannyń qaýipsizdik salasyndaǵy mańyzdy seriktes ekenin atap ótti.
«Bizdiń qaýipsizdik salasyndaǵy seriktesterimiz de ózgerissiz qalady. Bul oraıda Qazaqstan biz úshin óte mańyzdy seriktes bolyp qala beredi. Jyl sońyna deıin Qazaqstan BUU Qaýipsizdik Keńesine turaqty emes múshe retinde qatysady. Ortalyq Azııa eli úshin bul Keńeske qosylýdyń sáti endi týdy. Munda Qazaqstan búkil álem tap bolyp otyrǵan qaýipsizdik máselelerimen kúreste mańyzdy ról atqaratyn biregeı múmkindikke ıe boldy. Bul kezeń sizderdiń biregeı geografııalyq oryndaryńyz ben tarıhı-mádenı kózqarastaryńyzdy keńes jumysynda qoldanýǵa múmkindik beredi», - dedi ol.
Kezdesý barysynda A.Dankan eki el arasyndaǵy dıplomatııalyq qarym-qatynastyń 25 jyldyǵyn atap ótti. Ol eki el yntymaqtastyǵynyń beriktigine qýanysh bildire otyryp, seriktestiktiń keleshekte odan ári damı túsetinine senim bildirdi.
Atap ótken jón, Ulybrıtanııa - Qazaqstannyń eń iri alty ınvestorynyń biri. 1991 jyly Qazaqstannyń táýelsizdik alǵan sátinen beri Ulybrıtanııa salǵan tikeleı ınvestıtsııalar kólemi 25 mıllıard AQSh dollarynan asty.
