Brexit boıynsha Brıýssel men London arasynda qaıshylyqtar kóp
BRıÝSSELЬ. QazAqparat - Ulybrıtanııanyń Eýropalyq odaqtan shyǵýy týraly kelissózder boıynsha EO úılestirýshisi Mıshel Barne Brıýssel men London arasynda Brexit boıynsha aıtarlyqtaı qaıshylyqtar bar dep esepteıdi.
Bul týraly ol kelesi aptaǵa josparlanǵan Brexit boıynsha kelissózderdiń ekinshi kezeńi qarsańynda Brıýsselde ótken baspasóz máslıhatynda málimdedi.
«Ambıtsııalardaǵy ózgeshelikterdiń» mysaly retinde Barne Ulybrıtanııadaǵy EO azamattarynyń quqyqtary taqyrybyn keltirdi.
«Brıtandyq tarap bul tulǵalarǵa búgingideı ómir súrýge ruqsat bermeıdi, - dedi ol, - Eýropalyq odaq Ulybrıtanııadaǵy EO azamattarynyń brıtandyqtar sekildi teń quqyqqa ıe bolǵanyn qalaıdy. Al Ulybrıtanııa mundaı ózara kelisimge ruqsat bermeıdi».
Jaqyn arada ol Ulybrıtanııanyń Odaqtan shyǵý talaptaryna qatysty negizgi máseleler boıynsha EO pozıtsııasyn baıandaý úshin Londonǵa jeti qujat jibermek.
Atap ótken jón, buǵan deıin Eýropalyq keńestiń prezıdenti Donald Týsk Ulybrıtanııanyń Brexit-ten keıingi brıtandyq aýmaqtaǵy EO azamattarynyń quqyqtaryna qatysty usynysyna syn bildirgen edi.
Áńgime premer-mınıstr Tereza Meıdiń maýsym aıynda EO sammıti aıasynda jasaǵan «ádil» usynysy jóninde. Usynysqa sáıkes, Ulybrıtanııada turatyn Eýroodaq azamattary bes jylda turaqty yqtııar hat ala alady. Bul olarǵa Brexit-ten keıin memlekettik bilim berý men densaýlyq saqtaý qyzmetterin jáne áleýmettik jeńildikterdi paıdalanýyna múmkindik beredi.
Degenmen, brıtandyq premer EO sotynyń Brexit-ten keıin EO azamattarynyń quqyqtaryn baqylaýǵa kepildik etýine úzildi-kesildi qarsy boldy. Munymen Eýroodaq sotynyń turaqty quziretin talap etetin Brıýssel de kelispeı otyr.
