Bireýmen saıysýdy emes, el damýyna kedergi keltiretin máselelermen kúresýdi maqsat etemiz — Raýan Kenjehanuly
ASTANA. KAZINFORM — «Ádilet» partııasynyń quryltaı sezinen keıin BAQ ókilderiniń suraqtaryna partııany qurýǵa bastamashy toptyń ýákiletti ókili Raýan Kenjehanuly jaýap berdi.
Spıkerdiń aıtýynsha, «Ádilet» partııasy — jańa zamannyń partııasy.
— «Ádilet» partııasy ádilet qaǵıdasy men ádilet qundylyǵyn negizgi ustanym etip otyr. Buǵan deıingi tarıhta ádilettilik máselesi jetkilikti deńgeıde kóterilmegen. Endi sonyń ýaqyty keldi dep esepteımiz. Biz ótkenge syn aıtpaımyz, ár kezeńniń óz mindeti men basymdyǵy boldy. Bir kezeńde turaqtylyq pen birlik mańyzdy bolsa, búgingi kúnniń talaby — ádilettilik, — dedi ol.
Onyń aıtýynsha, Memleket basshysy usynǵan «Ádiletti Qazaqstan» tujyrymdamasy jańa partııa ıdeıasymen úndes.
— Jańa Konstıtýtsııany talqylaý jáne ony ázirleý úderisine de qatystyq. Sol kezde «ádilettilik» ıdeıasy bizge óte jaqyn boldy. Bizdiń maqsatymyz — ádilettilikti tek uran emes, ár azamattyń ómirinde naqty seziletin qaǵıdaǵa aınaldyrý. Ádiletsizdikpen kúresý — partııanyń negizgi baǵyty, — dedi Raýan Kenjehanuly.
Sondaı-aq ol jańa partııanyń basqa saıası partııalardan aıyrmashylyǵy men básekelestigi týraly pikir bildirdi.
— Saıası dodaǵa kelgennen keıin kez kelgen partııa zań aıasyndaǵy barlyq múmkindikti paıdalanyp, básekege túsedi. Árbir saıası kúsh kórinýge, qoldaý jınaýǵa tyrysady. Biz bireýmen saıysýdy maqsat etpeımiz, biz elimizdiń damýyna kedergi keltiretin máselelermen kúreskimiz keledi. Adamdarǵa nemese basqa saıası partııalarǵa qarsy emespiz. Túptep kelgende bárimiz bir eldiń azamatymyz, sondyqtan eldiń damýy jolynda básekelesýimiz kerek, — dedi ol.
Sezd aldynda myńǵa jýyq adam qatysqan jıyn ótkizilgen. Onda túrli óńirler men salalardan kelgen mamandar óz pikirlerin bildirgen eken.
— Ár óńirden, ár kásiporynnan mamandar keldi. Biz eńbek adamdarynyń pikirin tyńdap, ádilet pen ádilettiliktiń mańyzy týraly surastyrdyq. Biz eshkimge oppozıtsııa emespiz, jaý izdemeımiz. Bizdiń aldymyzda úlken ortaq mindetter bar, — dedi partııa ókili.
Aıta keteıik, «Ádilet» saıası partııasy basqarýshylar tobynyń múshesi Renat Bekturovta óz oıyn bildirdi.
