Bireýdi bildirtpeı túsirý qaýpi: Norvegııa «aqyldy kózildirikterge» tyıym salmaq
ASTANA. KAZINFORM — Norvegııa álemde alǵash bolyp birqatar qoǵamdyq orynda «aqyldy kózildirikti» paıdalanýǵa tyıym salǵan el bolýy múmkin. Shekteý mektepter, aýrýhanalar, saýda ortalyqtary, saıabaqtar jáne basqa da oryndarǵa qatysty bolýy yqtımal, dep habarlaıdy DW.
El úkimetiniń málimetinshe, shekteý saıabaqtar, jaǵajaılar, murajaılar, saýda ortalyqtary, mektepter, balabaqshalar, medıtsınalyq mekemeler, sport zaldary jáne buqaralyq is-sharalarǵa qoldanylýy múmkin.
— Adamdar ózderi úırengen, baqylaýda bolmaıtyn oryndar men jaǵdaılarda jasyryn sýretke nemese vıdeoǵa túsirilip qalýy múmkin dep alańdaıtyn qoǵamda ómir súrgimiz kelmeıdi, — dedi Norvegııanyń tsıfrlandyrý jáne memlekettik basqarý mınıstri Torgeır Mıkaelsen.
Zań jobasynyń bastamashysy — azshylyq úkimetin basqaryp otyrǵan Eńbek partııasy. Partııa qujatty parlament qaraýyna «múmkindiginshe tezirek» engizýdi josparlap otyr. Zańdy qabyldaý úshin basqa saıası kúshterdiń qoldaýy qajet.
Bul bastama Eýropada «aqyldy kózildirikti», ásirese Meta kompanııasynyń qurylǵylaryn paıdalanýǵa qatysty alańdaýshylyq kúsheıgen tusta kóterilip otyr.
Frantsııada buǵan deıin balalardyń quqyqtaryn qorǵaýmen aınalysatyn e-Enfance uıymy áıelderdi kelisiminsiz vıdeoǵa túsirýdiń shamamen 20 jaǵdaıyn tirkegenin habarlaǵan. Keıbir beınejazbalar keıin áleýmettik jelilerde jarııalanǵan. Bul jaǵdaılarǵa qatysty Parıj prokýratýrasy tergeý júrgizip jatyr.
Buǵan deıin Danııa mektepterde uıaly telefon qoldanýǵa tegis tyıym salatynyn jazǵan edik.
