Bresttegi týrnırde qazaqstandyq arnaıy jasaq ІІ oryn ıelendi
ASTANA. KAZINFORM — Qazaqstandyq arnaıy jasaq sarbazdary Belarýstegi parashıýt sporty týrnırinde joǵary nátıje kórsetti, dep habarlady Qorǵanys mınıstrliginiń baspasóz qyzmeti.
Brest qalasynda Belarýs Respýblıkasy Arnaıy operatsııalar kúshteriniń bastamasymen uıymdastyrylǵan halyqaralyq parashıýt sporty týrnıri óz máresine jetti.
Jarysqa uıymdastyrýshy eldiń úzdik komandalarymen qatar Qazaqstan, Reseı jáne Ózbekstannyń quramalary qatysty. Týrnırde jalpy sany 32 komanda baq synady.
Qazaqstan atynan jarysta Desanttyq-shabýyldaý áskerleri, Arnaıy operatsııalar kúshteri jáne Arnaıy operatsııalar kúshteri men Desanttyq-shabýyldaý áskerleriniń áıelder quramasy qatysty.
— Tartysty básekeniń qorytyndysy boıynsha Qazaqstan Qarýly kúshteri Arnaıy operatsııalar kúshteriniń komandasy ІІ oryndy ıelenip, ózderiniń joǵary kásibı sheberligin, tózimdiligi men jaýyngerlik rýhyn taǵy bir márte dáleldedi, — delingen habarlamada.
Budan buryn qazaqstandyq arnaıy jasaq aqpan aıynda Dýbaıdaǵy halyqaralyq týrnırde top jarǵanyn jazǵanbyz.
