Birer aı demalyp, jattyǵýdy qaıta bastaımyn – Nurbek Oralbaı

ASTANA. KAZINFORM – Parıj Olımpıadasynyń bokstan kúmis júldegeri Nurbek Oralbaı Qazaqstanǵa oraldy, sonymen qatar boksshy aldaǵy josparymen bólisti. 

«Ekinshi oryn aldym, bul bizdi syndyrmaıdy, kerisinshe jigerlendiredi. Myqty qylady. Birer aı demalyp, em alyp, jattyǵýdy qaıta bastaımyn. Aldaǵy álem chempıonaty men Azııa chempıonatyna daıyndalamyz. Parıj birinshi olımpıada bolǵan soń, ońaıǵa soqpady, ol jaqqa eshkim utylý úshin barmaıdy, baryn salady. Altyn kelesi olımpıadada buıyrady dep oılaımyn», - dedi Parıj Olımpıadasynyń kúmis júlde ıegeri Nurbek Oralbaı. 

Búgin tańerteń astanalyqtar Olımpıada júldegeri Nurbek Oralbaıdy qarsy aldy. Elorda áýejaıyna boksshynyń jaqyndary, jankúıerler jáne BAQ ókilderi jınaldy.

 

Eske sala keteıik, bokstan erler arasynda 80 keli salmaqta Nurbek Oralbaı Parıj Olımpıadasynyń kúmis júldegeri atandy. Ol fınalda ýkraınalyq Aleksandr Hıjnıakpen judyryqtasyp, jeńilip qaldy. 

Sondaı-aq, otandyq boksshy kelesi Olımpıadada altyn alýǵa ýáde berdi.

Aıta ketsek, Kazinform tilshisi Nurbek Oralbaıdyń shańyraǵyna arnaıy baryp, ata-anasymen, týystarymen tildesken edi.