Brent pen WTI arzandady: munaı naryǵynda saýda aptasy qalaı bastaldy
ASTANA. KAZINFORM — Aldyńǵy kúnderi edáýir qymbattaǵan álemdik munaı baǵasy jańa saýda aptasyn tómendeýmen bastady. Bul týraly Kazinform agenttigi Reuters agenttigine silteme jasap habarlaıdy.
Naryq qatysýshylary Taıaý Shyǵystaǵy shıelenistiń báseńdeý múmkindigin jáne energııa resýrstaryn jetkizýge tóngen qaýip-qaterlerdi baǵalap jatyr.
Agenttik málimetinshe, 26 qazanda Qazaqstan ýaqytymen saǵat 19:37-degi jaǵdaı boıynsha Brent markaly munaıdyń jeltoqsan aıyndaǵy fıýchersteri 1,7 paıyzǵa, ıaǵnı 2,03 dollarǵa arzandap, barreline 114,70 dollar boldy.
Al amerıkalyq West Texas Intermediate (WTI) markaly munaıdyń baǵasy 2,5 paıyzǵa, ıaǵnı 2,60 dollarǵa tómendep, barreline 100,71 dollardy qurady.
Baǵanyń tómendeýine qaramastan, munaı kotırovkalary ótken aptada tirkelgen sońǵy alty aıdaǵy eń joǵary deńgeıge jaqyn qalyp otyr.
23 qazan, juma kúngi saýda qorytyndysy boıynsha munaı baǵasy barreline 3 dollardan astam ósti. Bir apta ishinde Brent shamamen 6 paıyzǵa, al WTI 2,3 paıyzǵa qymbattady.
Baǵanyń ósýine hýsıtterdiń Saýd Arabııasyndaǵy nysandarǵa jasaǵan shabýyldarynan keıin munaı jetkizilimi úzilýi múmkin degen qaýip sebep boldy.
Alaıda dúısenbi kúni AQSh pen Iran arasyndaǵy shıelenisti báseńdetýge baǵyttalǵan dıplomatııalyq áreketter týraly habarlardan keıin naryqtaǵy kóńil kúı ózgerdi.
Reuters málimetinshe, jeksenbi kúni Qatar ókilderi qaqtyǵysty báseńdetýge baǵyttalǵan deldaldyq kelissózderge qatysý úshin Tegeranǵa barǵan.
Saýd Arabııasy da Iranmen kelissóz arnalaryn saqtaýdyń mańyzyn málimdedi. Koroldik, Túrkııa jáne Pákistan ókilderi Irannyń resmı tulǵalarymen kezdesedi dep kútilgen.
Sonymen birge Taıaý Shyǵystaǵy jaǵdaı áli de shıelenisti kúıde qalyp otyr. Hýsıtter East-West munaı qubyrynyń sorǵy stantsııalaryna jáne Er-Rııad áýejaıyna shabýyl jasaǵanyn málimdedi. Al Saýd Arabııasynyń bıligi jańa zymyrandar men ushqyshsyz ushý apparattarynyń joly kesilgenin habarlady.
Energetıkalyq ınfraqurylym men teńiz arqyly tasymalǵa tóngen qaýip-qaterlerdiń saqtalýy álemdik munaı naryǵyndaǵy belgisizdikti kúsheıtip otyr.
Sarapshylardyń pikirinshe, munaı baǵasynyń aldaǵy ózgerisi kóbine Taıaý Shyǵystaǵy jaǵdaıdyń qalaı órbıtinine jáne dıplomatııalyq áreketterdiń nátıjesine baılanysty bolady.
Buǵan deıin Kazinform 26 qazan kúni tańerteń de álemdik munaı baǵasynyń tómendegenin habarlaǵan edi. Oilprice.com málimetinshe, Brent markaly munaı barreline 114,61 dollardan, al WTI 101,13 dollardan saýdalanǵan.
