Brent munaıynyń bir barreli $47-dan tómendedi
ASTANA. QazAqparat - 12 qańtarda ótken londondyq ICE Futures bırjasynda Brent markaly munaıdyń bir barreliniń quny $47 deıin tómendedi.
Aqpandaǵy jetkizilimdegi munaıdyń eń tómengi baǵasy barreli úshin $46,66 bolǵan. Saýda nátıjesi boıynsha Brent barreliniń quny $47,43 qurady. Aqpandaǵy jetkizilimniń mınımaldy kelisimshartynda WTI munaıynyń bir barreli Nıý-Iorktegi saýdada $45,30 dep kórsetilgen. Kún qorytyndysy boıynsha WTI barreliniń baǵasy $46,07 qurady. Amerıkandyq munaı baǵasy eldegi munaı qorynyń ulǵaıýy aıasynda arzandady. Bul jahandyq deńgeıde munaıdyń kóp bolýyna ákeledi, dep atap ótti Bloomberg. Sońǵy bir aptanyń ishinde AQSh-ta munaı qory 384,1 mln barrelge deıin artty. Bank of America Merrill Lynch sarapshylary eń qıyn kezderde Brent markaly munaıdyń bir barreli $40 deıin arzandaıdy dep sanaıdy. Al amerıkandyq sarapshylardyń aıtýynsha, WTI munaıynyń bir barreli $35 deıin tómendeıdi. Baǵanyń tómendeýi saldarynan Saýd Arabııasy nemese OPEK quramyna kirmeıtin elder munaı óndirý kólemin qysqartýǵa májbúr bolady, delingen sarapshylyq habarlamada. Jýyrda Saýd Arabııasy koroliniń nemeresi jáne ataqty arab ınvestorlarynyń biri hanzada ál-Valıd ıbn Talal ál Saýd USA Today jýrnalısterine bergen suhbatynda munaı barreliniń baǵasy $100 deńgeıine kóteriletinin joqqa shyǵardy. Munaıdy óndirý kólemi qazirgi deńgeıde, al suranys osylaısha az bolsa, onda munaı ári qaraı arzandaıdy, dedi hanzada. Óndiris kólemin azaıtyp, suranys artsa, onda qymbattaıdy, alaıda bir barreliniń quny $100 deıin jetpeıdi, dep qosty ol. «Endi munaıdyń baǵasy esh ýaqytta $100 deıin kóterilmeıdi dep oılaımyn», - dedi saýd hanzadasy bir jyl buryn aıtqan sózin eske salyp, dep jazdy RBK.
