Brent munaıynyń baǵasy barreline 39,77 dollarǵa deıin ósti

ASTANA. QazAqparat - Brent markaly munaıdyń 2016 jylǵy maýsymda jetkiziletin fıýchersteriniń quny Londondaǵy ICE bırjasynda 4,77 paıyzǵa ósip, barreli 39,77 dollardy qurady.

Munaı baǵasy AQSh-ta munaıdyń kommertsııalyq qory 4,93 mln. barrelge azaıyp, 529,9 mln. barrelge deıin tómendeýi týraly apta saıynǵy málimetter jarııalanǵannan keıin senimmen ósýge bet aldy, dep habarlady TASS.

«Jahandyq naryq munaı óndirýshi elderdiń sáýirdegi kezdesýi qarsańynda alypsatarlyqpen ómir súrýdi jalǵastyrýda», - dep sanaıdy Nordea bank taldamashysy Dmıtrıı Savchenko.

17 sáýirde Dohada ótetin kezdesý munaı óndirýdi aǵymdaǵy jyldyń qańtaryndaǵy deńgeıde turaqtandyrý máselesin talqylaýǵa arnalady.