Brent munaıynyń baǵasy 43 dollardan asty

NUR-SULTAN. QazAqparat - Álemdik bırjada Brent markaly munaıdyń baǵasy 6 naýryzdan beri birinshi ret 43 dollardan asty, dep habarlaıdy QazAqparat.

Bıylǵy tamyz aıynda jetkiziletin Brent markaly munaı fıýchersteriniń baǵasy Londonnyń ICE bırjasynda1,7% ósip, barreli 43,02 dollarǵa jetti. Saýda alańynyń sońǵy málimetterinde osylaı delingen.

Munaıdyń bul túriniń quny sońǵy ret 6 naýryzda 43 dollardan joǵary bolǵan edi. Odan keıin kúrt quldyrap ketti.

Al WTI markaly munaıdyń barreli 40,22 dollar deńgeıinde tur. Bul - ótken saýda kezindegi baǵadan 1,7 paıyz joǵary.

OPEK+ mınıstrleri 6 maýsymdaǵy keńeste taǵy bir aı boıy, ıaǵnı shildeniń sońyna deıin munaı óndirýdi azaıtý jóninde kelisken bolatyn. Bul - munaı óndirisi tarıhyndaǵy eń aýqymdy tómendetý bolyp otyr.