Brent munaıynyń baǵasy apta qorytyndysy boıynsha $94-tan asty
ASTANA.KAZINFORM - Álemdik naryqta munaı baǵasy Taıaý Shyǵystan jetkizilimge qatysty qaýiptiń saqtalýyna baılanysty 21 tamyzdaǵy saýda-sattyqty ósimmen aıaqtady. Brent markaly munaıdyń baǵasy barreline $94-tan asty, dep habarlaıdy Reuters.
Brent fıýchersteri saýda qorytyndysynda barreline $94,39 boldy.
AQSh-tyń WTI markaly munaıy $87,06 deńgeıinde jabyldy.
Apta qorytyndysy boıynsha Brent 6,39 paıyzǵa, al WTI 5,66 paıyzǵa qymbattady.
Eki markanyń da baǵasy 24 shildeden bergi eń joǵary deńgeıge jetti.
Munaı baǵasynyń ósýine Irannan jetkizilim kóleminiń qysqarýy múmkin degen qaýiptiń kúsheıýi áser etti.
AQSh Prezıdenti Donald Tramp Tegeranmen saýdasyn jalǵastyratyn elderge sanktsııa salynýy múmkin ekenin málimdedi.
Munaı naryǵyna Ormýz buǵazy arqyly keme qatynasynyń shektelýi de qysym jasap otyr.
Sonymen qatar AQSh, Birikken Arab Ámirlikteri jáne Venesýela sııaqty elderden balama jetkizilimderdiń artýy munaı baǵasynyń odan ári ósýin ishinara tejep otyr.
Buǵan deıin Brent baǵasynyń ekinshi apta qatarynan ósip jatqany habarlanǵan bolatyn. Beısenbiden jumaǵa qaraǵan túni onyń baǵasy barreline $94-qa jaqyndady.
