Brent munaıynyń baǵasy 110 dollarǵa jaqyndady
ASTANA. KAZINFORM- Dúısenbide Saýd Arabııasynyń energetıkalyq ınfraqurylymyna jasalǵan jańa shabýyldar jáne Taıaý Shyǵysta keme qatynasyna qatysty táýekelder aıasynda álemdik munaı baǵasy kúrt ósti.
Qazirgi ýaqytta Brent markaly munaıdyń baǵasy barreline shamamen 109,29 dollarǵa, WTI markasy 104,26 dollarǵa deıin kóterildi, dep habarlaıdy Reuters.
Agenttik málimetinshe, Brent baǵasy 4,68 dollarǵa nemese 4,5%-ǵa, al amerıkalyq West Texas Intermediate 4,21 dollarǵa nemese 4,2%-ǵa qymbattady. Eki markanyń da baǵasy shamamen 16 aptadaǵy eń joǵary deńgeıge jetip, saýda kúnin 19 mamyrdan bergi eń joǵary kórsetkishpen aıaqtaýy múmkin.
Munaı baǵasynyń ósýi Saýd Arabııasyndaǵy nysandar men óńirdegi kemelerge jasalǵan jańa shabýyldardan keıin jedeldedi. Buǵan deıingi soqqy Saýd Arabııasynyń munaıyn Ormýz buǵazyn aınalyp ótip tasymaldaýǵa múmkindik beretin Shyǵys–Batys munaı qubyryn isten shyǵarǵan edi. Reuters baǵalaýynsha, onyń jumysynyń buzylýy álemdik munaı usynysynyń 4%-yna deıin áser etýi múmkin.
Munaı baǵasynyń ósýine áser etip otyrǵan taǵy bir faktor – Ormýz buǵazy arqyly ótetin kemeler qozǵalysynyń qysqarýy. Kemeler qozǵalysyn aldyn ala baqylaý derekterine sáıkes, demalys kúnderi júk kemeleriniń táýliktik ótý sany bir tańbaly kórsetkishke deıin tómendegen. Al buǵan deıingi on kúndegi ortasha kórsetkish táýligine 14 kemeni quraǵan.
Osylaısha, jańa saýda aptasy munaı baǵasynyń aıtarlyqtaı jedel ósýimen bastaldy. 14 qyrkúıek tańerteń Brent barreline shamamen 107,42 dollardan, WTI 102,78 dollardan saýdalandy.
11 qyrkúıekte Brent baǵasy barreline 100 dollardan joǵary deńgeıde aptany aıaqtap, birneshe kún ishinde 8%-dan astam qymbattaǵan edi.
Saýd Arabııasyndaǵy «Shyǵys–Batys» munaı qubyrynyń jumysyn toqtatýy jáne Taıaý Shyǵystan munaı jetkizýge qatysty jańa táýekelder onyń joǵary baǵasyn qoldap otyr. Qazaqstan bul jaǵdaıdy paıdalanyp, munaı eksportyn arttyra ala ma? Bul máseleni Kazinform agenttiginiń tilshisi zerttedi. Tolyǵyraq agenttik sholýynan oqı alasyz.
