Brent munaıynyń baǵasy 11 mamyrdan beri alǵash ret 99 dollardan tómen tústi
ASTANA. KAZINFORM - AQSh pen Iran arasyndaǵy yqtımal kelisimge baılanysty álemdik munaı baǵasy kúrt tómendedi, dep habarlaıdy Kazinform agenttiginiń tilshisi.
25 mamyr kúni tańerteń Londondaǵy ICE bırjasynda Brent markaly munaıdyń shilde aıyna arnalǵan fıýchersteri 4,87%-ǵa arzandap, barreline 98,49 dollar boldy. Osylaısha Brent baǵasy eki aptadan astam ýaqyttan beri alǵash ret 99 dollarlyq mejeden tómen tústi.
WTI markaly munaı da aıtarlyqtaı arzandady. Saýda barysynda onyń quny barreline 92,05 dollar deńgeıinde qalyptasty.
Al Urals munaıynyń baǵasy 21 mamyrdaǵy jaǵdaı boıynsha barreline 101,30 dollar bolǵan.
Sarapshylar baǵanyń tómendeýin AQSh memlekettik hatshysynyń Iranmen kelissózderde «aıtarlyqtaı ilgerileý bar» degen málimdemesimen baılanystyryp otyr.
Naryq qatysýshylary Vashıngton men Tegeran arasynda ýaqytsha kelisim jasalýy múmkin dep kútip otyr. Mundaı kelisim Ormýz buǵazynyń ashylýyna jol ashýy yqtımal. Bul — álemdik munaı tasymalyndaǵy negizgi baǵyttardyń biri.
Buǵan deıin Vashıngton men Tegeran Ormýz buǵazy arqyly keme qatynasyn qaıta ashýdy kózdeıtin mámile boıynsha ortaq kelisimge kelgeni týraly jazdyq.
