Brent munaıy Taıaý Shyǵystaǵy qaqtyǵys aıasynda 100 dollarǵa jaqyndady
ASTANA. KAZINFORM - Munaı baǵasy Taıaý Shyǵystaǵy shıelenistiń kúsheıýi jáne shıkizat jetkizilimi úzilip qalýy múmkin degen alańdaýshylyq aıasynda ósip jatyr, dep habarlaıdy Reuters.
Basylymnyń málimetinshe, Grınvıch ýaqytymen 00:00-de (Astana ýaqytymen 05:00) Brent markaly munaı fıýchersteriniń baǵasy 34 tsentke nemese 0,35%-ǵa ósip, barreline 97,34 dollarǵa jetti.
Amerıkalyq West Texas Intermediate (WTI) munaıynyń baǵasy 1,15 dollarǵa nemese 1,26%-ǵa kóterilip, barreline 92,63 dollar boldy. Bir kún buryn Brent baǵasy 24 shildeden bergi eń joǵary deńgeıge jetken.
Sarapshylardyń aıtýynsha, Taıaý Shyǵystaǵy qaqtyǵystyń jaqynda ýshyǵýy Parsy shyǵanaǵynan munaı jetkizýge qoıylǵan shekteýlerdiń 2026 jyldyń sońyna deıin saqtalýyna ákelýi múmkin.
Sondaı-aq olar munaı jetkizilimi kóleminiń soǵysqa deıingi deńgeıge tolyq qalpyna kelýi 2027 jyldyń birinshi toqsanynyń sońynan nemese ekinshi toqsanynyń basynan erte bolmaıdy dep kútedi.
Eske sala keteıik, 7 qyrkúıek tańerteń Brent markaly munaıdyń baǵasy barreline 96,81 dollardy qurap, 0,53%-ǵa qymbattaǵan. Aıyrmaǵa arnalǵan kelisimshart (CFD) boıynsha saýda nátıjesine sáıkes, sońǵy bir aıda Urals munaıynyń baǵasy 12,89%-ǵa, al byltyrǵy osy kezeńmen salystyrǵanda 45,83%-ǵa ósti.
