Brent munaıy tankerlerge jasalǵan shabýyldar aıasynda 100 dollardan joǵary bolyp tur
ASTANA. KAZINFORM - 10 qyrkúıek tańerteń álemdik munaı baǵasy joǵary deńgeıde qalyp otyr. Brent markaly munaıdyń baǵasy barreline 100 dollardan joǵary bolsa, WTI munaıy kemelerge jasalǵan jańa shabýyldar jáne Ormýz buǵazy arqyly munaı jetkizilimine qatysty saqtalyp otyrǵan táýekelder aıasynda áli qymbattap jatyr, dep habarlaıdy Kazinform agenttigi Reuters agenttigine silteme jasap.
Agenttik málimetinshe, Brent markaly munaı fıýchersteri 0,1%-ǵa ósip, barreline 101,34 dollar boldy.
Amerıkalyq West Texas Intermediate (WTI) munaıynyń baǵasy 0,5%-ǵa qymbattap, barreline 96,55 dollarǵa jetti.
Aldyńǵy kúni Brent saýda-sattyqty barreline 101,21 dollar deńgeıinde aıaqtap, 3,4%-ǵa qymbattady. WTI baǵasy 3,25%-ǵa ósip, 96,05 dollar boldy. Eki marka úshin de bul 22 mamyrdan bergi eń joǵary kórsetkish.
Baǵanyń ósýine Taıaý Shyǵystaǵy jaǵdaıdyń odan ári shıelenisýi sebep boldy. Iran Ormýz buǵazy mańynda on kemege shabýyl jasalǵanyn málimdedi. Buǵan deıin AQSh bes ırandyq munaı tankerin joıǵanyn habarlaǵan bolatyn.
Sarapshylardyń baǵalaýynsha, taraptardyń ózara soqqylary Parsy shyǵanaǵynan munaı jetkizýdiń uzaq ýaqytqa úzilý qaýpin arttyrady. Qaqtyǵysqa deıin álemdik munaı men gaz jetkiziliminiń shamamen besten bir bóligi ótken Ormýz buǵazy arqyly tasymal kólemi soǵysqa deıingi deńgeıden áli de aıtarlyqtaı tómen.
Budan bólek, AQSh-tyń Energetıkalyq aqparat basqarmasy álemdik qorlardyń azaıýy jáne Taıaý Shyǵystan jetkizilim kóleminiń tómendeýi aıasynda bıylǵy jáne kelesi jylǵa arnalǵan munaı baǵasyna qatysty boljamyn kóterdi.
Buǵan deıin munaı baǵasy alǵash ret 24 shildeden beri barreline 101 dollardan asqany týraly jazdyq.
