Brent markaly munaıdyń baǵasy 50 dollardan asty

ASTANA. QazAqparat - Munaıdyń álemdik baǵalary juma kúni Baker Hughes kompanııasynyń AQSh-ta jumys istep otyrǵan burǵylaý qondyrǵylary týraly málimetter negizinde ósti. Brent markaly munaıdyń baǵasy saýda barysynda bir barreli úshin 50 dollardan asqan, dep kórsetedi saýda málimetteri.

Bul týraly RIA «Novostı» habarlap otyr.

Jergilikti ýaqytpen saǵat 21:33-tegi jaǵdaı boıynsha, Brent markaly soltústikteńizdik munaı qospasynyń jeltoqsandaǵy fıýchersteriniń quny 1,37 paıyzǵa ósip, bir barrel úshin 49,47 dollardy qurady, bul rette ol 19 qazannan beri bir barrel úshin 50 dollardan asatyn baǵany alǵash ret kórsetken. WTI markaly munaıdyń fıýcherster baǵasy 0,90 paıyzǵa ósip, bir barrel úshin 46,48 dollarǵa deıingi baǵany kórsetti. Amerıkanyń Baker Hughes munaı-gaz qyzmeti kompanııasynyń málimetterinshe, shtattarda aıaqtalǵan jumys aptasynyń qorytyndylary boıynsha burǵylaý qondyrǵylarynyń jalpy sany 12 danaǵa, nemese 1,52 paıyzǵa qysqaryp, 775 birlikti quraǵan. Jyldyq mánde bul kórsetkish 1154 birlikke, nemese 59,8 paıyzǵa tómendegen. Bul rette munaı burǵylaý qondyrǵylarynyń sany 16 birlikke, nemese 2,69 paıyzǵa, 578 danaǵa deıin tómendegen. Gazdy barlaý qondyrǵylarynyń sany bul rette 4 birlikke, nemese 2,07 paıyzǵa ósip, 197 qondyrǵyny quraǵan.