Brent markaly munaıdyń baǵasy 115 dollardan asty

NUR-SULTAN. QazAqparat – Bıylǵy jyldyń 17 mamyrynda Brent markaly munaı fıýchersteriniń baǵasy sáýirdegi baǵamen salystyrǵanda (barreline $104,58) 9,1% ósip, barreline 115,05 dollardy qurady, dep habarlaıdy QazAqparat Investing saıtyna silteme jasap.

Sonymen qatar, bıyl munaıdyń bul túri qunynyń eń joǵary kórsetkishi 2022 jyldyń 8 naýryzynda barreline 127 dollar bolǵan.

Brent munaıy Londonnyń ICE fıýcherstik bırjasy arqyly álemdik naryqta elektrondy túrde satylatyn shıki munaıdyń álemdik jetkiziliminiń jartysynan kóbin quraıdy jáne álem boıynsha munaı satyp alý úshin bazalyq baǵa retinde qyzmet etedi.

Soltústik teńizden óndiriletin Brent markaly munaı sondaı-aq London Brent, North Sea Oil, Brent Blend jáne Brent petroleum ataýlarymen belgili.

Bul – WTI-dan sál aýyr jáne kúkirti az, dızeldi, benzındi óńdeýge óte yńǵaıly jeńil shıki munaı markasy.