Brent markaly munaı barreliniń baǵasy 124 dollardan asty

BAKÝ. QazAqparat – Munaıdyń álemdik baǵasy ósip keledi. Buǵan saýda-sattyq derekteri dálel, dep habarlady QazAqparat menshikti tilshisi Caspian barrel-ge silteme jasap.

Brent markaly munaıdyń tamyz fıýchersteriniń baǵasy 0,39% - ǵa deıin ıaǵnı barreline 124,07 dollarǵa deıin ósti. Shildedegi WTI fıýchersteri 0,29% - ǵa, ıaǵnı 122,47 dollarǵa deıin qymbattady.

Investorlar AQSh-taǵy munaı qorynyń apta saıynǵy statıstıkasyn baǵalaıdy.

Eldiń Energetıka mınıstrliginiń derekteri boıynsha munaıdyń strategııalyq rezervi ótken aptada 7,3 mıllıon barrelge nemese 1,4 paıyzǵa azaıyp, 519,3 mıllıon barreldi qurady. Osylaısha, kórsetkish 1987 jyldyń naýryzdaǵy aptasynan beri eń tómengi deńgeıge jetti. Ol kezde eldiń strategııalyq munaı qory 518,9 mıllıon barreldi quraǵan bolatyn.

Sonymen qatar, AQSh-taǵy kommertsııalyq munaı qory (strategııalyq rezervti qospaǵanda) bir apta ishinde boljanǵan tómendeýdiń ornyna 2 mln barrelge nemese 0,5%-ǵa ósip, 416,8 mln barrelge jetti.

Eldegi eń iri Kýshıng (Cushing) termınalyndaǵy munaı qory bir apta ishinde 25 mıllıon barrelden 23,4 mıllıonǵa deıin azaıdy.

AQSh-taǵy benzın qory 0,8 mln barrelge (0,4% -ǵa), ıaǵnı 218,2 mln barrelge deıin tómendedi. Sarapshylar 1,1 mıllıon barrelge ósedi dep kútken edi.