Brent markaly munaı baǵasy barreline 90 dollardan tómendedi
ASTANA. QazAqparat - Brent markaly munaıǵa qarasha fıýchersiniń baǵasy beısenbi kúni, 9 qazanda barreli 90 dollardan tómendep, 89,97 dollar deńgeıinde boldy. Munaıdyń osy sortynyń baǵasy buǵan deıin 2012 jylǵy maýsymda osylaısha quldyraǵan bolatyn, dep habarlady RBK.
Keıinirek bul baǵam belgilenimi azdap kóterilip, osy materıaldy daıarlaý ústinde Brent munaıy 90,13 dollarǵa satyldy. Atalǵan kúndegi eń joǵary kórsetkish 91,85 dollar deńgeıinde tirkeldi, degenmen saýda sessııasynyń basym bóligi turaqty túrde tómendep otyrdy.
WTI markaly munaıdyń baǵasy AQSh-ta shıki benzın qorynyń ósýimen baılanysty 2 tamyzda barreli 90 dollar deńgeıinde tómen túsken bolatyn.
Munaı baǵasy úshinshi aı boıy álemdik naryqta osy taýarǵa usynystyń ósýimen baılanysty quldyrap otyr. Bloombergtiń budan buryn jarııalanǵan sholýyna qaraǵanda OPEK elderinde qyrkúıek aıynda munaı óndirý artty, sonyń ishinde Lıvııa kóshbasshylar qatarynda bolyp, munaı óndirý bir jyldan asa ýaqytta burynǵy eń joǵary kórsetkishke jetti.
Munaıǵa álemdik baǵalar reseı ekonomıkasy úshin mańyzdy makroekonomıkalyq kórsetkish bolyp tabylady. Budan buryn qyrkúıekte Reseı banki 2015 jylǵa jáne 2016-2017 jyldarǵa arnalǵan aqsha-nesıe saıasaty jobasyn jarııalady, onda oqıǵanyń damýynyń úsh stsenarııi qarastyrylǵan.
Neǵurlym aqtımal stsenarıı retinde álemdik ekonomıkanyń birte-birte qalpyna kelýi jáne munaı baǵasynyń eleýsiz tómendeýi qarastyrylady. Onda munaı baǵasy 2014 jyldyń basynan bastap ortasha eseppen barreli 106,5 dollardan bastap, 2017 jyly jyl ishinde orta eseppen 102,5 dollarǵa deıin birte-birte tómendeýi qarastyrylǵan.
