Brent markaly munaı baǵasy 32 AQSh dollarynan tómen túsip ketti
Koronavırýstyń saldarynan álemdik ekonomıka deńgeıi 2 trln AQSh dollarǵa azaıýýy múmkin. Saýda jáne damý boıynsha BUU konferentsııasy óz baıandamasynda osyndaı boljam jasap otyr.
Jalpy álemdegi turaqsyz ahýal eń iri eki munaı óndirýshiniń arasyndaǵy túsinispeýshilikke ákep tiredi. Buǵan deıin habarlanǵanyndaı, Venadaǵy OPEK+ múshe memleketteri mınıstrleriniń kelissózderi Reseı men Saýd Arabııasynyń kelisimge kele almaýy saldarynan tyǵyryqqa tirelgen. Artynsha 9 naýryzda Brent markaly munaı baǵasy barreline 24,1 paıyzǵa – 34,36 AQSh dollaryna deıin tómendedi. Saýda barysynda munaı 2016 jyldyń qańtarynan beri birinshi ret 31,02 AQSh dollaryna deıin quldyrady.
Osy jyldyń 10 jeltoqsanynda S&P Global Halyqaralyq reıtıng agenttigi 2020 jyly Brent markaly munaı baǵasyna boljam jasap, ary ketkende munaı barreli 40 AQSh dollaryna tómendeıtinin boljaǵan edi. Áıtse de agenttik bıyl ortasha eseppen baǵanyń 60 AQSh dollary deńgeıinde saqtalatynyn alǵa tartqan.
Munaı baǵasynyń quldyrap, dollar men eýro baǵamynyń qubylýy halyqaralyq bırjalardyń ındeksine aıtarlyqtaı jaǵymsyz sıpatta yqpal etýde. Máselen eýropalyq bırjalar dúısenbide quldyrap ketti. FTSE 100 London bırjalyq ındeksi 7,7 paıyzǵa, nemistiń DAX ındeksi 7,9 paıyzǵa, frantsýzdyq CAC 40 8,4 paıyzǵa tómendedi.
Al Qazaqstan qarjy bırjasyndaǵy KASE ındeksi 2020 jyldyń 10 naýryzynda 4,7 paıyzǵa azaıdy.
Bul oqıǵalar kóptegen memlekettiń úkimetterin eldegi ekonomıkalyq jaǵdaıdy sheshý úshin jedel sharalar qabyldaýǵa jeteledi. Máselen, baǵanyń turaqtylyǵyn saqtaý úshin Qazaqstan Respýblıkasynyń Ulttyq banki bazalyq mólsherlemeni 12 paıyzǵa deıin kóterý týraly tótenshe sheshim qabyldady. Sonymen qatar, valıýta naryǵynyń turaqtanýyn jáne qarjylyq turaqtylyqty qamtamasyz etý úshin Ulttyq bank qajetti valıýtalyq ınterventsııalardy júzege asyrady. Ol úshin elde valıýtalyq aktıv jetkilikti mólsherde bar. Bul sharalar ınflıatsııanyń jedeldeýin shektep, ulttyq valıýtanyń shamadan tys qubylýyna jol bermeıdi.
