Brent markaly munaıdyń baǵasy bir barrel úshin 59 dollardan tómen tústi

ASTANA. KAZINFORM – Sársenbi kúni Brent markaly munaıdyń bir barrel baǵasy tórt jyldaǵy eń tómengi deńgeıge jetti, dep habarlaıdy Kazinform agenttigi. 

Sársenbi kúni álemdik munaı baǵasy tómendedi. Brent markaly munaıdyń baǵasy 2021 jylǵy 4 aqpannan beri alǵash ret bir barrel úshin 59 dollardan tómen tústi.

Eske sala keteıik, Májiliste ótken brıfıng barysynda Premer-mınıstrdiń orynbasary — Ulttyq ekonomıka mınıstri Serik Jumanǵarın munaı baǵasy quldyraǵan jaǵdaıda Úkimettiń úsh túrli stsenarııi bar ekenin málimdedi.

— Bizde úsh stsenarıı bar. Qazirgi tańda biz barrel úshin 60 dollar baǵasy kezindegi pessımıstik stsenarııge jaqynbyz. Qaı bıýdjet shyǵyndaryn qysqartatynymyzdy, al qaısysyn esh jaǵdaıda qysqartpaıtynymyzdy naqty bilemiz, — dedi vıtse-premer.

Buǵan deıin habarlanǵandaı, munaı baǵasynyń tómendeýi Tramp engizgen jańa baj salyǵy men OPEK+ sheshimderiniń aıasynda oryn alyp otyr. Artyq usynys qaýpi men saýda shıelenisiniń kúsheıýi munaı baǵasyna qosymsha qysym túsirip jatyr.

Aıta ketelik 7 sáýirdegi jaǵdaı boıynsha bir apta ishinde (31 naýryz ben 7 sáýir aralyǵynda) 14,1%-ǵa tómendep, barreline $65-ten tómen tústi. Valıýta ındeksi bir apta ishinde 1,8%-ǵa álsiredi. Osy jaǵdaıǵa baılanysty Ulttyq bank valıýta naryǵy nege qubylyp turǵanyn túsindirgen edi.