Brent markaly munaı baǵasy 4 paıyzdan astam ósti
ASTANA. KAZINFORM - 24 naýryz, seısenbi kúni tańerteń munaı baǵasy aldyńǵy kúngi kúrt tómendeýden keıin qaıta ósim kórsetti, dep habarlaıdy TASS agenttigi.
Londondaǵy ICE bırjasynda 2026 jyldyń mamyryna jetkiziletin Brent munaıynyń baǵasy 4%-dan astamǵa ósti. TASS deregine sáıkes, 24 naýryz tańdaǵy málimet boıynsha Brent quny 4,41%-ǵa ósip, barreline 104,35 dollardy qurady.
Sonymen qatar, 2026 jyldyń mamyryna jetkiziletin WTI munaı fıýchersteri 4,31%-ǵa qymbattap, barreline 91,93 dollarǵa jetti.
Buǵan deıin AQSh prezıdenti Donald Tramp Irannyń energetıkalyq ınfraqurylymyna yqtımal soqqy berýdi bes kúnge keıinge qaldyrýdy tapsyrǵan.
Onyń aıtýynsha, bul sheshim Vashıngton men Tegeran arasyndaǵy «ónimdi kelissózderge» baılanysty qabyldanǵan.
Alaıda Iran bıligi AQSh-pen kelissózder júrgizilgenin joqqa shyǵarady. Tramptyń málimdemesi aıasynda ICE bırjasynda 2026 jyldyń mamyryna jetkiziletin Brent munaıynyń baǵasy bir kún buryn 14%-dan astamǵa tómendep, 96 dollar deńgeıine túsken edi. Bul kórsetkish 2026 jylǵy 12 naýryzdan bergi eń tómen deńgeı boldy.
Buǵan deıin Aq úı basshysy Tegeranǵa ýltımatým qoıyp, 48 saǵat ishinde Ormýz buǵazyn keme qatynasy úshin ashýdy talap etken. Áıtpese, Irannyń energetıkalyq ınfraqurylymyn «joıyp jiberetinin» eskertken.
Óz kezeginde Iran Ormýz buǵazyn tolyq jabatynyn, Izraıldiń energetıkalyq jáne IT-ınfraqurylymyna, sondaı-aq óńirdegi AQSh bazalary ornalasqan elderdegi elektr stantsııalaryna soqqy berýi múmkin ekenin málimdedi.