Brent 2023 jyly barreline $110 deıin qymbattaıdy – UBS boljamy

BAKÝ. QazAqparat – 2023 jyly munaı baǵasy kóteriledi, buǵan óndiris pen Qytaı jáne damýshy elder ekonomıkasyn qalpyna keltirýge ınvestıtsııanyń azdyǵy sebep bolmaq. UBS Group AG shveıtsar bankiniń sarapshylary osyndaı boljam jasady, dep habarlaıdy QazAqparattyń menshikti tilshisi.

Bank joramaly boıynsha Brent baǵasyn belgileý jyl sońynda barreline - 110, WTI - 107 dollarǵa deıin jetedi.

Brent markaly munaıdyń fıýchersi ICE Futures London bırjasynda keshe barreline $78,30 shamasynda satyldy. WTI munaıynyń kelisimsharttary barreline shamamen $73,80 jetti.

«Munaıǵa suranys táýligine 1,6 mln barrelge deıin ósedi jáne jalpy suranys 2023 jyldyń ekinshi jartysynda rekordtyq kórsetkish – táýligine 103 mln barrelden asýy múmkin», - delingen UBS esebinde. Ósimniń kóp bóligi Azııanyń damýshy ekonomıkasyna keledi.

Sonymen qatar, bank sarapshylarynyń pikirinshe, 2023 jyly OPEK+ quramyna kirmeıtin elderdegi munaı usynysy táýligine 1,3 mln barrelge kóterilýi yqtımal.

Qara altyn baǵasynyń ósýine ınflıatsııa, AQSh-taǵy qatań eńbek naryǵy men jetkizý tizbegindegi basqa shekteýler saldarynan shyǵyndardyń kóbeıýi sebep.

Ázerbaıjanǵa keler bolsaq, AR úkimetiniń boljamynsha, elde gazkondensatpen munaı óndirý 2023 jyly 31,2 mln tonna shamasynda bolady. 2022 jyly 32,7 mln tonna boljanǵan, ıaǵnı bıyl munaı óndirý 4,6%-ǵa tómendeıdi.

Qytaıda suranys artady degen úmitpen munaı baǵasy juma kúni kóterildi, biraq álemdik ekonomıka aýqymynda shıki munaı baǵasy bir aptaǵa tómendedi.

Brent markaly munaı fıýchersi 56 tsentke nemese 0,71%-ǵa, ıaǵnı barreline 79,25 dollarǵa ósti. AQSh-ta West Texas Intermediate markaly munaı fıýchersi 60 tsentke nemese 0,81%-ǵa – barreline 74,27 dollarǵa qymbattady.

Foto: ubs.com