Brendti arzan telefon: Elordalyq boıjetkender ınternet-alaıaqqa aldandy
NUR-SULTAN. QazAqparat - Jańa jyl meıramy qarsańynda ınternet jelisinde onlaın-saýda jandana tústi. Syılyqtarǵa suranystyń artqanyn baıqaǵan alaıaqtar da aldap-arbaýdyń jańa túrlerin oılap tabýda, dep habarlaıdy QazAqparat tilshisi.
Máselen, elorda polıtsııasyna qala turǵyndarynan birneshe shaǵym túsip úlgergen. Qyz-kelinshekter áleýmettik jeli arqyly brendti uıaly telefondardyń sońǵy úlgilerine tapsyrys berip, jetkizý qyzmeti úshin de aqy tólegen.
«Jańajyldyq jeńildikter kórsetilgen kóztartarlyq akkaýnt elordalyq boıjetkenderdiń nazaryn ózine aýdarǵan. Alaıaqtyń elektrondy ámııanyna aldyn ala tólem jasaǵan olardyń barlyǵy da taýardyń bar-joǵyna kóz jetkizbegen. Ámııanǵa aqsha túskennen keıin akkaýnt buǵattalyp, al elektrondy ámııan ıdentıfıkatsııalanbaı qalǵan. Osylaısha zardap shegýshiler aqshasyz da, syılyqsyz da qalyp otyr», - dep atap ótedi Nur-Sultan qalalyq Polıtsııa departamentinen.
Tergeý amaldary barysynda polıtsııa qyzmetkeri Almaty qalasynda turatyn Reseı azamatshasyn ustady. Áıeldiń uıaly telefondar satýmen aınalysýǵa nıeti de bolmaǵan. Al akkaýntty aldaý maqsatynda ashqan. Zardap shegýshilerden túsken aqshany qajetine jaratyp úlgergen.
Qazirgi ýaqytta zardap shegýshilerdiń naqty sany anyqtalýda. Kúdiktige qatysty sotqa deıingi tergeý amaldary qolǵa alynǵan. Jalpy materıaldyq shyǵyn 600 myń teńge mólsherinde baǵalanyp otyr.
Osyǵan oraı Nur-Sultan qalalyq Polıtsııa departamenti azamattarǵa mynadaı qarapaıym saqtyq sharalaryn ustanýǵa keńes beredi:
- vıdeobaılanys arqyly taýardyń bar ekendigine kóz jetkizý qajet;
- tólemdi taýardy qolǵa alyp, ony teksergennen keıin ǵana aýdarý kerek.
Internet-saýdadaǵy alaıaqtyqtyń belgileri:
- satýshynyń telefony men mekenjaıy kórsetilmeıdi;
- satýshymen baılanysty tek jazba arqyly júrgizýge usynady;
- taýar baǵasy ózge satýshylar usynǵan dál sondaı zattyń baǵasymen salystyrǵanda tym tómen bolady.
