Bred Pıtt Oskar syılyǵyn aldy
GOLLIVÝD. QazAqparat – Amerıkalyq akter Bred Pıtt Oskar syılyǵynyń 92-shi marapattaý saltanatynda «Bir kúni... Gollıvýdta» fılmindegi róli úshin «Ekinshi plandaǵy úzdik akter» syılyǵyn aldy, dep habarlaıdy QazAqparat The Guardian saıtyna silteme jasap.
Bred Pıtt rejısser Kventın Tarantıno túsirgen «Bir kúni... Gollıvýdta» fılminde Leonardo Dı Kaprıomen birge kaskader rólin somdaıdy.
Akterdyń nomınatsııa úshin básekelesteri Al Pachıno men Djo Sends («Irlandyq»), Tom Henks («Kórshiles bolǵan tamasha kún»), Entonı Hopkıns («Eki áke») boldy.
56 jastaǵy akter Tarantınoǵa qurmet kórsete otyryp, bul marapatyn balalarǵa arnaıtynyn aıtty. Ol sondaı-aq óz ata-anasyna, kaskaderlerge jáne fılmdegi áriptesi Dı Kaprıoǵa alǵysyn bildirdi.
Pıtt óz róli úshin birneshe syılyqqa ıe bolǵan, onyń ishinde Baftastaǵy ekinshi plandaǵy úzdik akter, Altyn Globýs jáne akterler gıldııasyn da alǵan bolatyn. Bul – ol onyń akterlik sheberligi úshin ıe bolǵan alǵashqy Oskary.
