Birdeı jumysty isteıtin áıelderdiń erkekterden tómen jalaqy alýyna eshqandaı sebep joq — Lıýk Trıangl

ASTANA. KAZINFORM — Birdeı jumysty isteıtin áıelderdiń erkekterden tómen jalaqy alýyna eshqandaı sebep joq. Bul týraly Halyqaralyq kásipodaqtar konfederatsııasynyń bas hatshysy Lıýk Trıangl aıtty. 

— Birneshe kún buryn Almatyda bolsam, qazir Astanadamyn. Sizder 85 myń teńge eń tómengi aılyqpen eshteńe isteı almaısyzdar. Tipti, jarty aı ómir súre almaısyzdar. Eń tómengi aılyq ósýi tıis. Sizder ómir súrýge jeterlikteı aılyq berýlerińiz kerek. Qazaqstan dál osy úshin kúresýi tıis, — dedi ol Qazaqstaan Kásipodaqtar federatsııasynyń XXVII sezinde.

Sonymen qatar ol aldaǵy ýaqytta qazba otyndarǵa degen qajettilik birtindep tómendeıtindigin aıta kele, elimizdiń batysynda shoǵyrlanǵan munaı-gaz sektory jumysshylary úshin jańa jumys oryndaryn qurýǵa keńes berdi.

— Atalǵan óńirde bolashaq ındýstrııasyn tabýlaryńyz qajet. Munaı-gaz sektory jumysshylary úshin jańa óndirister qalyptastyryp, jańa jumys oryndaryn qurý kerek. Klımattyq ózgeristerge baılanysty ol qyzmetkerler jumyssyz qalatyn bolsa, onda tek Qazaqstan ǵana emes búkil álemdegi kásipodaqtar problemaǵa tap bolady, — dedi ol.

Munan bólek Lıýk Trıangl Qazaqstanǵa jumysshylardy áleýmettik qorǵaý kólemin arttyrýǵa keńes berip, genderlik teńdik máselesine toqtaldy.

— Birdeı jumysty isteıtin áıelderdiń erkekterden tómen jalaqy alýyna eshqandaı sebep joq. Birdeı jumysqa teńdeı jalaqy alýy qajet. Osy baǵytta jumys isteńizder. Osy baǵytta kóshbasshy bolyńyzdar, — dedi Halyqaralyq kásipodaqtar konfederatsııasynyń bas hatshysy.

Buǵan deıin Qazaqstan HEU-nyń eń tómengi jalaqyǵa qatysty konventsııasyn ratıfıkatsııalaıtyndyǵyn jazǵan edik.