Birde-bir oqýshy óz máselesimen oqshaý qalmaýy kerek – Mınıstr bala qaýipsizdigi týraly
ASTANA. KAZINFORM – Balanyń qaýipsizdigi, tárbıesi jáne ádep mádenıeti bilim berý júıesiniń ajyramas bóligi bolýǵa tıis. Bul týraly Oqý-aǵartý mınıstri Juldyz Súleımenova Astanada ótip jatqan Tamyz konferentsııasynda aıtty.
Mınıstr sapaly bilim eń aldymen bala ózin qaýipsiz ári senimdi sezinetin ortadan bastalatynyn atap ótti.
– Qurmetti Prezıdent! Sizdiń tapsyrmańyzben 2026-2030 jyldarǵa arnalǵan «Qazaqstan balalary» tujyrymdamasynda qaýipsizdik, bilim, densaýlyq, tárbıe jáne áleýmettik qoldaý birtutas saıasatqa biriktirildi, – dedi Juldyz Súleımenova.
Onyń aıtýynsha, bilim berý júıesiniń basty qaǵıdalarynyń biri – balany kez kelgen máselesimen jalǵyz qaldyrmaý.
– Sondyqtan biz «Adal azamat» tárbıe baǵdarlamasyna erekshe mán bólemiz. Baǵdarlamanyń negizgi maqsaty – otanshyl, bilimpaz, eńbekqor, elge janashyr jáne zańǵa baǵynatyn adal azamat tárbıeleý. Osy turǵydan jastardyń boıynda qoǵamdyq ádepti, jaýapkershilik pen ózara qurmet mádenıetin sińirýdiń orny erekshe, – dedi Oqý-aǵartý mınıstri.
Aıta keteıik, elordada Prezıdent Qasym-Jomart Toqaevtyń qatysýymen pedagogterdiń Tamyz konferentsııasynyń plenarlyq otyrysy bastaldy. Oǵan elimizdiń barlyq óńirinen 600-den astam bilim salasynyń qyzmetkerleri men eńbek ardagerleri qatysyp otyr.
Qazaqstanda 2019 jyldan beri 511 jańa aýyl mektebi salynǵan.
Elimizde aýyl men qala oqýshylary arasyndaǵy bilim alshaqtyǵy 5 balǵa qysqarǵan.
Sondaı-aq Jańa Konstıtýtsııa bilim berý salasyna jańa mindetter júktep otyr.
