Brazılııanyń túngi klýbynda bolǵan órt saldarynan 232 adam mert boldy
ASTANA. 28 qańtar. QazAqparat - Órt Santa-Marııa qalasynda ornalasqan túngi klýbta 27 qańtarǵa qaraǵan túni oryn aldy.
Klýbtyń mekemesinde ótken stýdenttik keshte rok toptary óner kórsetken. Órt mýzykanttar sahnada petarda jaǵa bastaǵannan keıin bastaldy. Azdaǵan ýaqyttyń ishinde jalyn búkil klýbty sharpydy, kelýshiler arasynda úreı bastaldy.
Qalalyq órt sóndirý qyzmetiniń basshysy Gýıdo de Melonyń sózine qaraǵanda, klýbtan shyǵa beris esik tek bir jaqtan bolǵan, qaza bolǵandardyń basym deni qyspaqqa alyný men tunshyǵýdan mert bolǵan.
150 adamnyń máıiti tanyldy. Júzdegen adam túrli jaraqattar aldy.
Qaıǵyly oqıǵa oryn alǵan kezde Kiss klýbynda eki myńnan astam adam bolǵan.
Brazılııa Qorǵanys mınıstrliginiń ókilderi túngi klýbta bolǵan órttiń saldarynan kóz jumǵan adamdardyń naqty sanyn anyqtady, dep habarlady Reseı «Jańalyqtar» agenttigi.
Sońǵy málimetter boıynsha, 232 adam mert boldy, 131-i jaraqattar aldy. Buǵan deıin 245 adamnyń kóz jumǵany jóninde habarlanǵan bolatyn. Qaza bolǵandardyń ishinde 120 er adam men 112 áıel bar.
Anyqtalǵandaı, túngi klýb lıtsenzııasyz jumys istegen.
