Brazılııanyń ońtústigindegi daýyl 21 adamnyń ómirin qıdy
SAN-PAÝLÝ. QazAqparat – Brazılııanyń ońtústiginde daýyl soǵyp, saldarynan birneshe qalada sý tasqyny boldy, 21 adam qaza tapty. Bul týraly keshe bılik ókilderi málim etti, dep habarlaıdy QazAqparat AR basylymyna silteme jasap.
Rıý-Grandı-dý-Sýl shtatynyń gýbernatory Edýardo Leıte buryn-sońdy shtatta daýyl saldarynan osynsha qurban bolmaǵanyn aıtty. Sondaı-aq ol tropıkadan tys tsıklonǵa ulasqan daýyldan shamamen 60 qala zardap shekkenin atap ótti.
50 myńǵa jýyq turǵyny bar Mýkým qalasyndaǵy úılerdiń birinde 15 adam qaıtys bolǵan. Takýarı ózeni arnasynan asyp, qalanyń 85%-in basyp qalǵan.
Resmı tulǵalardyń sózinshe, 1650 adam baspanasyz qaldy, 3700-den astam turǵyn tsıklon saldarynan úılerin tastap ketýge májbúr boldy. 24 saǵatqa jetpeıtin ýaqyt ishinde 300 mıllımetrden astam (12 dıýmǵa jýyq) jańbyr jaýyp, sý tasqyny men kóshkin týdyrǵan, dep habarlady France 24.
Bılik ókilderi qaza tapqandar sany artýy múmkin ekenin eskertip otyr.
Rıý-Grandı-dý-Sýl shtatyna bıyl maýsymda tóngen tropıkadan tys tsıklon saldarynan 16 adam qaza tapqan bolatyn. 40 qala qırady. Onyń kóbi shtat astanasy Portý-Alegrıge jaqyn mańda ornalasqan.
