Brazılııanyń fýtbol akademııasynda tálim alǵan qazaq fýtbolshylaryna jańa bapker keldi
ASTANA. QazAqparat - Astanadaǵy «Báıterek» fýtbol klýbyna jańa bapker keldi. Bul týraly Qazaqstannyń fýtbol federatsııasy habarlady.
Aıta keteıik, komanda quramyn negizinen Brazılııanyń «Ole Brazıl/Botafogo» fýtbol akademııasynda eki jyl jattyǵyp kelgen fýtbolshylar quraıdy.
«Qazaqstannyń jasóspirimder quramasynyń aǵa bapkeri, tanymal reseılik maman Mıhaıl Solovev «Báıterek» (Astana) fýtbol klýbynyń bas bapkeri qyzmetine keldi», - delingen habarlamada. Eske sala keteıik, Qazaqstan men Brazılııanyń birlesken jobasy 2009 jyly bastaý alǵan bolatyn. Qazaqstannyń jas órenderiniń birinshi legi San-Paýlýda «Ole Brazıl Klab» akademııasynda eki jyl jattyǵyp qaıtqan bolatyn. Qazaq fýtbolshylarynyń ekinshi toby 2012 jyly naýryzda ketti.
