Brazılııanyń eń baı áıeli belgili boldy
ASTANA. 24 tamyz. QazAqparat - Brazılııanyń eń baı áıeli Dırse Navarrý de Kamargý bolyp shyqty. Ol búginde dúnıeden ótken ataqty magnat Sebastıan Kamargýdyń jesiri. Bul týraly «Bırjevyı lıder» basylymy habarlaıdy.
Bloomberg reıtıngisi boıynsha onyń dáýleti 13 mıllıardqa jýyq qarjyny quraıdy. Brazılııada ol baılyǵy jóninen úshinshi qatarda tur. Al mıllıarderdiń jahandyq tiziminde 59-orynda jaıǵasqan.
Buǵan deıin egde áıeldiń munshama qarjysy bar ekendigi kópshilikke belgisiz bolyp kelgen. Ol jubaıy qurǵan Camargo Correa fırmasyna ıelik etedi, al bul qurylymnyń belgili bir bóligine qyzdary - Rejına, Rosana jáne Renata ıelik etedi. Fırmany tájirıbeli ákimshiler basqarady, al otbasy músheleri basshylyqtyń isine kóbine aralaspaıdy.
Osy fırmany qurǵan Sebastıan Kamargý 1909 jyly týǵan. Jasóspirim kezinde ol esek jegilgen arbamen qum tasyǵan kórinedi. 30 jasynda eki áriptesimen birlesip qurylys bıznesin bastaǵan. Ótken ǵasyrdyń ortasynda kompanııa temir jol men onyń ınfraqurylymyn salý úshin memleketten birden birneshe tenderdi jeńip alǵan. Odan keıin memlekettiń jańa astanasy - Brazılıany salýǵa belsene qatysqan. Kamargý 1994 jyly qaıtys bolǵannan keıin de biraz ýaqyt Brazılııanyń azdaǵan mıllıarderleriniń ishinde esimi atalyp júrgen.
Camargo Correa kásiporny búginde de memlekettik jobalarmen aınalysady, sonyń ishinde Rıo-de Janeıroda tórt jyldan keıin ótetin Olımpıadalyq oıyndar nysandaryn salýǵa belsene qatysady. Burnaǵy jylǵy prezıdent saılaýynda kompanııa eki negizgi úmitkerge demeýshi bolǵan. Kásiporynnyń enshiles kásiporyndary álemniń 20 memleketinde jumys isteıdi.
