Brazılııanyń burynǵy prezıdenti 9,5 jylǵa sottaldy
ASTANA. QazAqparat -Sársenbi kúni Brazılııa soty eldiń burynǵy prezıdenti Lýısa Inasıý Lýla da Sılvany sybaılas jemqorlyq pen aqsha jymqyrǵany úshin aıypty dep tanyp, oǵan toǵyz jyl alty aıǵa sottaý úkimin shyǵardy. Tıisti úkim ońtústikamerıkalyq respýblıkanyń federaldyq sot organdarynyń resmı saıtynda jarııalandy, dep habarlaıdy QazAqparat TASS agenttigine silteme jasap.
Bul Brazılııa tarıhynda memleket basshysy sybaılas jemqorlyq úshin sottalǵan alǵashqy jaǵdaı.
Sot úkimi Lýla da Sılva taıaý ýaqytta qamaýǵa alynatynyn bildirmeıdi. Brazılııalyq zańnamaǵa sáıkes, sottalýshy apellıatsııaǵa bergen jaǵdaıda, aıyptaý úkimin ekinshi ınstantsııa soty rastamaıynsha ol bostandyqta bolady. Bul ázirge birinshi ınstantsııa sheshimi.
Qylmystyq is Gýarýja (San-Paýlý shtaty) kýrorttyq qalada ornalasqan úsh deńgeıli páterge qatysty boldy. 2016 jylǵy qyrkúıekte prezıdentke 3,7 mln real (sol kezdegi baǵam boıynsha 1,1 mln dollar) somasynda aqsha jymqyrdy jáne sybaılas jemqorlyqqa bardy degen aıyptar taǵyldy.
Qazirgi ýaqytta Lýla da Sılva sybaılas jemqorlyqqa qatysty taǵy 4 qylmystyq istiń fıgýranty bolyp otyr. Brazılııalyq zańnamaǵa sáıkes, eger eks-prezıdent atalmysh protsessterdiń biri boıynsha aıypty dep tanylsa, ol saılanatyn laýazymdarǵa úmitker bolý quqyǵynan aıyrylady.
