Brazılııanyń 200 jyldyq tarıhy bar Ulttyq murajaıy janyp ketti
ASTANA. QazAqparat - Rıo-de-Janeıroda ornalasqan Brazılııanyń Ulttyq murajaıyn órt jalmady. Ǵımarat eldiń eń kóne ǵylymı ortalyqtarynyń biri bolǵan edi, dep habarlaıdy Globo telearnasy.
Órt sóndirýshilerdiń áreketterine qaramastan, tilsiz jaý mýzeıdiń 20 mln eksponattan turatyn toptamasyn, sondaı-aq kitaphananyń aýqymdy bóligin joıdy.
Atap ótilgendeı, janyp jatqan ǵımaratqa sýdy jetkizý qıynǵa soqqan. Onyń ústine, eksponattardy saqtaý úshin tez tutanatyn hımıkattar paıdalanylyp kelgen.
Oqıǵanyń mán-jaıy men kelgen shyǵyn kólemi anyqtalýda. Qurbandar men zardap shekkender joq. Mýzeıdiń baspasóz qyzmetinen málim etkendeı, jumys ornynda bolǵan tórt baqylaýshy qyzmetker ǵımarattan ýaqytynda shyǵyp úlgergen.
El prezıdenti Mıshel Temer bul, barsha brazııalyqtar úshin qaıǵyly oqıǵa ekenin aıtty.
Brazılııanyń Ulttyq murajaıy Rıo-de-Janeıronyń soltústik bóligindegi Kınta-da-Boa-Vısta saıabaǵynda ornalasqan. Onyń negizin 1818 jyly Portýgalııa koroli Jaýn VI qalaǵan. Mýzeı toptamasy 20 mıllıon eksponattan turdy. Olardyń arasynda janýarlar, jándikter, mıneraldar, turmys quraldary, mysyr jáne ońtústikamerıkalyq mýmııalar, artefaktiler jáne taǵy basqalary bolǵan.
