Brazılııada jolaýshylar avtobýsy aýdarylyp, 17 adam qaza tapty

ASTANA. KAZINFORM – Brazılııanyń bılik ókilderi eldiń soltústik-shyǵysynda jolaýshylar avtobýsy apatqa ushyrap, keminde 17 adamnyń qaza tapqanyn málimdedi, dep habarlaıdy Kazinform Anewz-ke silteme jasap.

Oqıǵa Pernambýký shtatynyń Saloa eldi mekeninde bolǵan. Avtobýsta shamamen 30 jolaýshy bolǵan. Kólik kórshiles Baııa shtatyndaǵy Brýmadý qalasyna baǵyt alǵan kezde úıilgen qumǵa soǵylyp, aýdarylǵan.

Polıtsııanyń málimetinshe, júrgizýshi rólge ıe bola almaı, qarsy jolaqqa shyǵyp ketken. Jol jıegindegi tastarǵa soǵylyp, keıin óz jolaǵyna qaıta oralyp, úıýli jatqan qumǵa soǵylǵannan keıin avtobýs bir jaǵana qaraı aýdarylyp qalǵan.

Jergilikti ppattyń naqty sebepterin anyqtap jatyr. Júrgizýshi jeńil jaraqat alǵan. Sondaı-aq oǵan júrgizilgen alkogol testi teris nátıje kórsetti.

Baııa shtatynyń gýbernatory Jeronımý Teısheıra áleýmettik jelide qaıǵyly jaǵdaıǵa baılanysty kóńil aıtty. Ol jergilikti bılik ókilderi qutqarý operatsııalaryna jáne qaza tapqandardy anyqtaý jumystaryna kómektesip jatqanyn rastady.

– Men bul jaǵdaıdy komandammen jiti baqylap otyrmyn. Qaza tapqandarǵa, jaraqat alǵandarǵa jáne olardyń otbasylaryna qaıǵyryp kóńil aıtamyn, – dep jazdy gýbernator.

Eske sala ketsek, buǵan deıin Brazılııada avtobýs pen júk kóligi soqtyǵysyp, keminde 11 adam qaza tapqan.