Brazılııanyń ońtústigindegi klımattyq apattan qaza tapqandar sany 151-ge jetti

SAN-PAÝLÝ. KAZINFORM – Brazılııanyń ońtústigindegi klımattyq apattyń qurbany bolǵandar sany 151-ge jetti, 104 adam iz-túzsiz joǵalǵan. Bul týraly beısenbi kúni Brazılııanyń azamattyq qorǵanys agenttigi habarlady, dep jazady Sınhýa. 

29 sáýirden beri eldiń ońtústigindegi Rıo-Grande-dý-Sýl shtatynda jaýǵan nóser jańbyrdyń sońy sý tasqyny men laı kóshkinine ulasyp, 600 myńǵa jýyq adam baspanasynan aıyryldy. 

Keıingi 24 saǵatta qaza tapqandar sany 149-dan 151-ge deıin ósti. Sý tasqyny shtattyń 497 qalasynyń 458-ine, sonyń ishinde eldiń ákimshilik ortalyǵy Portý-Alegrıge de áser etip jatyr. Olardyń kópshiligin Gýaıba ózeninen kelgen sý basqan. 

Azamattyq qorǵanys agenttiginiń málimetterine súıensek, Argentına jáne Ýrýgvaımen shektesetin jáne Brazılııa agrobıznesiniń ortalyǵy, Latyn Amerıkasynyń eń iri kúrish óndirýshisi sanalatyn shtattaǵy apattardan 2,28 mıllıonnan astam adam zardap shekken. 

Brazılııa prezıdenti Lýıs Inasıo Lýla da Sılva sársenbide aımaqqa taǵy da baryp, ýaqytsha baspanalardy panalaǵandarmen sóılesip, qıyndyqqa tap bolǵan otbasylarǵa jańa úı satyp alýǵa kómektesetinin aıtty. 

Aıta keteıik, buǵan deıin Brazılııada sý tasqynynan qaza tapqandar sany 144 adamǵa jetkenin jazǵan edik.