Brazılııanyń eks-prezıdenti Jaır Bolsonarý úı qamaqqa alyndy

ASTANA. KAZINFORM — Brazılııa Joǵarǵy soty eldiń burynǵy prezıdenti Jaır Bolsonarýdy úı qamaqqa alý týraly sheshim qabyldady. Oǵan ádilet júıesine qysym jasaýǵa tyrysty degen aıyp taǵylyp otyr. Bul týraly DW basylymy habarlaıdy.

Bolsonarý Brazılıa qalasyndaǵy óz úıinde úı qamaqta bolady. Oǵan uıaly telefondardy qoldanýǵa tyıym salynǵan jáne tek shekteýli adamdar tobymen ǵana sóılesýge ruqsat etilgen. Joǵarǵy sot sýdıasy Aleksandr dı Moraes qabyldaǵan sheshim sottyń resmı saıtynda jarııalandy.

Sýdıanyń aıtýynsha, 3 tamyz kúni Bolsonarý ınternet arqyly óz jaqtastaryna úndeý jasap, áleýmettik jelilerdi paıdalanýǵa salynǵan tyıymdy buzǵan. Ol bul áreketti uldarynyń telefondary arqyly iske asyrǵan. Sýdıa bul jaǵdaıdy ádilet júıesine qysym kórsetý áreketi retinde baǵalady.

Qazirgi tańda 70 jastaǵy Bolsonarýǵa 2022 jylǵy prezıdent saılaýyndaǵy jeńilisten keıin, qazirgi prezıdent Lýıs Inasıý Lýla da Sılvanyń úkimetin qulatýǵa baǵyttalǵan astyrtyn áreketke qatysy bar degen aıyp taǵylyp otyr. 2023 jyldyń 8 qańtarynda Bolsonarýdyń jaqtastary Lýla qyzmetine kiriskennen keıin kóp uzamaı Kongress, Joǵarǵy sot jáne prezıdent saraıyna basyp kirgen bolatyn.

Óz kezeginde Bolsonarý barlyq aıyptaýlardy joqqa shyǵaryp keledi.

19 shildede oǵan elektrondy bilezik taǵylyp, túngi ýaqytta úıde bolý jáne áleýmettik jelilerdi qoldanbaý mindettelgen edi.

Al 30 shildede AQSh bıligi sýdıa Aleksandr dı Moraeske qarsy sanktsııa engizdi. Ony Bolsonarýǵa qatysty saıası qýdalaýǵa jol berdi dep aıyptady.

Budan buryn Brazılııanyń burynǵy prezıdenti Jaır Bolsonarý el astanasy Brazılııada ornalasqan aýrýhanada ishegine ota jasatqany habarlandy.