Brazılııanyń botanıkalyq baǵynda Almatynyń aporty ósetin boldy
ASTANA. KAZINFORM — Brazılııa astanasynyń botanıkalyq baǵynda almatylyq aport alma aǵashynyń resmı tanystyrylymy ótip, aqparattyq taqtaısha ornatyldy. Bul týraly Qazaqstan Respýblıkasynyń Brazılııa Federatıvtik Respýblıkasyndaǵy Elshiligi málim etti.
Іs-sharaǵa brazılııalyq taraptan Federaldy okrýg úkimetiniń halyqaralyq máseleler jónindegi Atqarýshy hatshysy Paolo Sezar Chaves, elordalyq Botanıkalyq baǵy dırektorynyń orynbasary Danıella Fernandes Martıns Anos Soares Allan Freıre, «Qazaqstan — Brazılııa» Dostyq forýmynyń prezıdenti Ýlısses Rıdel, «Brazılııa — Qazaqstan» Saýda-ónerkásip palatasynyń prezıdenti Kassıano Vıana, Brazılııa SІM ókilderi, dıplomatııalyq korpýs, dostyq qoǵamy jáne jergilikti BAQ qatysty jáne sóz sóıledi.
Qazaqstan Elshisi Bolat Núsipov óziniń alǵy sózinde budan bylaı basqa sheteldik memlekettermen qatar, Qazaqstan da Brazılııanyń elordalyq Botanıkalyq baǵynda óziniń «mańdaı aldy» — Almatylyq aport alma aǵashtaryn tanystyrý múmkindigine ıe bolǵanyn atap ótti. Qazaqstandyq dıplomat, Aport almasynyń shyǵý tarıhyna toqtalyp jáne bul jemistiń halqymyz úshin kıeliligin erekshe atap ótip, aǵashtarǵa laıyqty kútim jasap úrgen Botanıkalyq baq ujymyna alǵys bildirdi.
Federaldy okrýgtiń úkimeti atynan Paolo Chaves Qazaqstan Elshiligine eldiń Botanıkalyq baǵynyń qoryn Qazaqstannan ákelingen jańa aǵash túrimen tolyqtyrý múmkindigi úshin alǵys aıtty. Onyń aıtýynsha, almatylyq aport alma aǵashtary, jyldan jylǵa sany qarqyndy ósip kele jatqan Botanıkalyq baq kelýshileriniń Qazaqstanǵa degen qyzyǵýshylyǵynyń artýyna qosymsha serpin beredi.
Brazılıa Botanıkalyq baǵy (Jardim Botânico de Brasília) 1985 jylǵy 8 naýryzda qurylǵan. Bul — Serrado ekojúıesi basym Brazılııadaǵy alǵashqy botanıkalyq baq (Serrado — Brazılııa aýmaǵyndaǵy savannalyq bıom). Baqtyń jalpy aýmaǵy 5000 gektardy qurap, onyń 526 gektary kelýshiler úshin ashyq. Munda sırek kezdesetin aǵashtar men ósimdikterdiń túrleri ósedi.
Botanıkalyq baqta «Ulttar men memleketter alleıasy» (Alameda das Nações e dos Estados) dep atalatyn arnaıy aımaq ornalasqan. Onda álemniń túrli elderin tanystyratyn aǵashtar men ósimdikter ornalastyrylǵan (mysaly, Japonııadan — sakýra; Ispanııadan — lavanda, záıtún aǵashtary, jasmın; Izraılden — qurma palmalary, záıtún aǵashtary jáne injir jáne t. b.).
Buǵan deıin Almaty oblysynda aport almany qaıta jańǵyrtatyn baq salynyp jatqanyn jazdyq.